Түлкібастың апорты

 Түлкібастың апортынан дәм татып көрдіңіз бе? Жеміс жидегі бренд, туризмі танымал ауданның ең басты саласы- агросектор. Таулы аймақта орналасқандықтан мұнда алма шаруашылығын дамыту өте қолайлы. Бұл аймақ – ежелден сапалы және экологиялық таза өнімнің эталоны саналып келгені белгілі. Кеңестік кезеңде даңқы сонау Одаққа дейін жеткен деңгейді қайтару үшін түлкібастық бағбандар бау шаруашылығын дамытуды қайта рекордтық көрсеткішке шығармақ.

Фуджи, Голден делишес, Стар Кримсон, Легалина, Айдарет- бұл алманың жоғары сұрыпты түрлері. Және де бұл шетелде емес, табиғаты көркем Түлкібас төрінде. Қазіргі таңда тау етегінде күздік алма жинау науқаны қызу жүруде. Жалпы алма бау көлемі 231 гектарды құрайтын шаруашылықтың 188 гектары қарқынды бау. Мұнда сұранысқа ие алманың 12 түрі өсіріледі. Апорт алмасымен танылған түлкібастық бағбандар алдағы уақытта брэнд болатын алма бау шаруашылығын дамыту мақсатындағы жұмыстарды ширатуда.

Ел байлығын еселеуге өз үлестерін қосып, жоғары көрсеткішке қол жеткізіп отырған кәсіпкерлер арасында «Кентау» жауапкершілігі шектеулі серіктестігі бар.Аталмыш мекеме маусымды жұмыспен 100-120 адамды, ал тұрақты жұмыспен 40 адамды қамтып отыр. Тұрақты жұмысшыларға алма бау маңынан барлық жағдаймен қамтылған арнайы жатахқана қарастырылған. Жиналған өнімді қыс мезгілінде сақтау үшін жалпы сыйымдылығы  2000 тонналық заманауй қоймасы бар. Ал, ауданда 8900 тоннаны сақтауға қауқарлы 6 қойма бар.

Еңбек етсең ерінбей, тояды қарның тіленбей. Машақаты көп болғанымен алар өнім еселі дейді мекеме қызметкері. 21 ғасыр озық технолгиялар заманы дегендей, бұл ғимарат жаңа техникалармен толықтай қамтамасыз етіліпті. Аппарат алмаларды өзі бірінші, екінші сұрыптарға бөліп, жуып тазалайды екен.

 Дәмі бал татитын, шырыны мол алма сұртының көшеттерін сонау Түркі елінен алдырады екен.Ал, бағасына келер болсақ келісін 300 теңгеден саудалайды. Бұл да бір аймақтың әлеуетін көтеріп, халық арасынадағы жұмыссыздықтың алдын алып отыр. Шалғай жатқан ауыл болса да, тұрғындар қол қусырып қарап отырмай қысы-жазы аянбай еңбек етуде..