Жыл сайын жаңа серпінмен қадам басып келе жатқан ауданға қарасты «Шамшырақ» Түлкібас қоғамдық –саяси газетінің редакциясы заман талабына сай жаңа құрылғылармен толығып, қызмет көрсету аясын кеңейтіп отыр. Аудан әкімі Нұрлан Байғұттың тікелей ұйытқы болуымен демеушілер есебінен редакция жанынан жаңа ғимарат бой көтеріп, түрлі кеңсе заттары блокноттар, папкалар, кітапшалар, күнтізбелер және стенд шығаратын болған.
Енді, алыстан арбаламай, жақыннан дорбалауға болады. Кезінде алысқа ат жетектеп, түрлі қағаздарды басып шығару үшін қалаға ағылатын Түлкібас халқына «Шамшырақ» редакциясы алдағы уақытта озық технологиялармен қызмет көрсететін болады.Мұнда, фрезерлі кесу мен лазерлі ойып жазу сынды қызмет түрлері қосылған. Баспахана кез-келген тапсырыс түрлерін қабылдайды. Ал түскен табыс газет редакциясын қамтуға жұмсалады.
Осы уақытқа дейін облысымызда алғашқылардың бірі болып, баспахана алып, газеттер мен журналдар, кітаптар шығарып ел игілігіне қызмет етсе, алдағы уақытта кеңселік заттар шығаруды қолға алған.Сонымен қатар, Шамшырақ қоғамдық-саяси газеті де ауданның тыныс тіршілігін халыққа жеткізіп келеді.Қазіргі таңдак 16 адам жұмыс атқарады, газет тиражы 6200-ді құрап отыр.
