Халықтық топ жылу маусымына дайындық барысымен танысты

   Бүгін де Халықтық Топ мүшелері таңдалған сала бойынша «Жылу» мекемесіне барып, көпқабатты үйлердің жылу маусымына дайындығы бойынша ақпарат алды. Топ мүшелері барған сәттен қала әкімінің тікелей қадағалауымен жүргізіліп жатқан жылу қазандығын сұйық отын түріне өткізу жұмыстарының ортасынан түсті.

     Мекеме басшысы Ерғазы Рысбековтың сөзінше, қазірде құрылыс жұмыстары кестеге сай жүргізілуде. Мұнда «Asi building» мердігерлік етіп жатқан істе 22 жұмысшы болса, оның 14-і жергілікті тұрғындар. Және олар «Халықты жұмыспен қамту орталығы» арқылы жұмысқа тіркелген.

Топ мүшелерін толғандырған сауалдың бірі газ түріндегі қазандық істен шығып қалар болса, тұрғындарға жылуды қалай жеткізетіндігі. Дегенмен, мекеме ол үшін көмір де алынып қойғанын және техникалық қолайсыздық болған тұста, әдеттегіше жылу берілетіндігін айтты.

Жалпы, бұған дейін бір маусымға 75 көпқабатты үй, 28 бюджеттік және 55 коммерциялық мекеме, 56 жеке үйді жылыту үшін 16000 тонна көмір жағылып, 123 адам қызмет еткен. Қазірде «Отырар» мөлтек ауданында қазандық орнатылса, орталық мешіт жанынан да тағы бірі орнатылуда. Мекеме басшысы, сондықтан қызметкерлер босамай, жұмыс орнын сақтап қалатынын айтуда.

Жалпы, қазірде Германиядан әкелінген қазандықтар орнатылып, монтаж жұмыстары жүргізілуде. Жарамдығына сай 50 жыл пайдаланылады деп күтілуде. Ал, топ мүшесінің жылудың қандай уақытта берілетіндігі жайлы сауалына, егерде күн суыған сәтте температура үш күн қатарынан 8 градусты көрсетсе жылу беру басталатынын, ал үш күн қатарынан 10 градусты көрсетсе, жылу беру тоқтатылатыны түсіндірілді.