12 тамызда Қазақстан Республикасы Парламенті Сенатына депутаттардың сайлауы өтеді. Еліміздің үшінші мегаполисінен үміткерлер саны үшеу. Бұған дейін, Сенат депутаты болып келген Айгүл Қапбарованың кезекті рет кандидатурасын қалалық мәслихат депутаттары ұсынды. Шымкент қаласының әкімдігінде өткен сайлау комиссиясының отырысында мұнан өзге өзекті мәселелер талқыланып, алдағы жоспар айқындалды. Бұл жолғы сайлау несімен ерекшеленеді? Халық үніне құлақ түрген үміткерлердің уәдесі қандай?
Иә, бұл жолғы сайлау бұрынғыдан өзгерек. Қатаң тәртіп барлығына ортақ. Санитарлық талаптар сақталып, қауіпсіздік басты назарда болуы тиіс. Осындай қиындықтарға қарамастан, сайлауалды науқан қарқын ала бастады. Өңірден ұсынылған үміткерлер өз бағдарламаларымен таныстырды. Атқарылатын қыруар істердің бар екендігі анықталып, алдағы жоспарлар жайында сөз қозғалды. Қаламыз үшінші мегаполис деп танылса да, түйіні шешілмеген түйткілді мәселелер баршылық. Оның бірі — баспана мәселесі. Қала бойынша 40 мыңнан астам отбасы тұрғын үй кезегінде тұр. Оның 5 мыңы көпбалалы отбасылар.
