Түркістан облысында дәрі-дәрмек жетіспеушілігін жою мақсатында Өзбекстан Республикасынан 500 млн. теңгеге індетке қарсы препараттар сатып алынды. Тиісті дәрілер дәріхана сөрелеріне жақын күндері түседі. Дәрілер шекті бағаны сақтай отырып сатылатын болады. Бұл туралы өңірлік коммуникациялар қызметінде өткен онлайн-брифингте Түркістан облысының әкімі Өмірзақ Шөкеев мәлім еткен болатын.
Ал, «Nur Otan» Партиясының Түркістан облыстық филиалының жанынан құрылған «Жас Түркістан» еріктілер клубы демеушілерді ұйымдастырып, облыс аумағында халыққа көмек беруді қолға алды. Медициналық демалу аппараттарының жетіспеушілігі мен дәрі тапшылығын болдырмау мақсатында Түркиядағы Қазақстан Консулдығымен байланысқа шықты. Нәтижесінде, «Nur Otan» Партиясының Түркістан облыстық филиалы төрағасының бірінші орынбасары Бейсен Тәжібаев жеке қаражатының есебінен, 2 бірдей оттегі консентратор құрылғысын сатып алды.
Жақын күндері Түркиядағы Елшіліктің көмегімен дипломатиялық жүк Алматыға жеткізіледі. Сонымен қатар, бұл бастамаға қолдау білдірген азаматтардың қатарында Түркістан облыстық мәслихаттың депутаттары Баймахан Сүлейменов пен Жаңабай Ағабек бар. Баймахан Сүлейменов 2 оттегі консентратор аппаратын алуға көмек қолын созса, Жаңабай Ағабек 6 құрылғының қаражатын аударған.
