Дәріханалар дерт алдында дәрменді ме?

Шымкент қаласында дәрі-дәрмек қарапайым тұрғындарға  қолжетімді ме? Дәрі тапшы кезде, ұрымтал тұсты ұтымды пайдаланып, қаржыға қарық болсам деген алыпсатарлардың арзан пиғылы шығар шыңына шықты ма? Дәріханалардағы арнайы рейдтік шараларды қала әкімінен бастап әр аудан басшылары жіті қадағалауына алған. Мұндай тексеріс жұмыстарынан шығатын нәтиже қандай?

 Шымкент қаласында дәрі-дәрмектің жеткілікті деп хабарланғанымен, Әл-Фараби ауданындағы бірер дәріханаларда дәрі-дәрмектің тапшылығы туындап отыр. Іздеген дәрісін таппаған сатып алушылардан сөз естіген фармацевт өзінің жан айқайын білдірді. Ал, бұл жағдайды Әл-Фараби ауданының әкімі бірінші кезекте дәрінің тапшылығы дәріханада емес, ауруханада болмау керектігін атап өтті.

Айта кетейік, бүгін «Nur Otan» партиясы, Шымкент қаласы Әл-Фараби аудандық филиалының төрағасы, аудан әкімі Ғ.Мәуленқұлов бастаған қоғамдық мониторингтік топ аудан аумағындағы орналасқан ірі дәріханаларда болып, халық сұранысындағы дәрі-дәрмектердің қолжетімділігі мен бағасының тұрақтылығына зерделеу жұмыстарын жүргізді.

Ондағы мақсат – дәріхана сөрелерінде дәрі-дәрмек тапшылығын, бағаларының шарықтау деңгейін, сатып алынған дәрі-дәрмекке чек берілу-берілмеуін қадағалау, сондай-ақ дәрі бағаларының мемлекет бекіткен баға тұрақтылығы мен халыққа қолжетімділігі бойынша мониторинг жүргізу.

Әл-Фараби ауданы аумағында жалпы 118 дәріхана бар. Олардың 32-сі 24 сағат жұмыс істесе, қалған 86-сы күнделікті азанғы 9:00-ден кешкі 21:00-ге дейін қызмет көрсетеді екен.

Бүгінгі рейдтік іс-шара барысын Әл-Фараби ауданы қызметкерлерімен қатар, арнайы мониторингтік мекеме қызметкерлерінің белсене араласуымен қоғамдық бақылау жұмыстары жүргізілді. Мұндағы басты мақсат – қала дәріханаларының сөрелерінде дәрі-дәрмек тапшылығын, бағаларының шарықтау деңгейін, сатып алынған дәрі-дәрмекке түбіртек берілу-берілмеуін зерделеу еді.

Сонымен қатар, қала түрғындарының сауалдарына жауап беретін жаңа орталық тәулік бойы жұмыс жасап жатқанын ескере кетсек. Қазіргі індет кезіндегі эпидемиологиялық жағдайға байланысты кез келген сауалдарыңызға 109 нөміріне қоңырау шалу арқылы жауап ала аласыз. Орталық барлық емханалармен және дәріханалармен ыңғайластырылып ақпараттандырылған. Аталмыш орталық сіз іздеген  дәріні қайдан табуға болатыны жайында мәлімет бере алады. Егерде, сіз  шектік бағадан асырып сату жағдайымен жолықсаңыз немесе куәгер болсаңыз 109 нөміріне хабарласып шағымдана аласыз.

«Айғақ-Ақпарат».