Рашид Аюпов: «Еліміз туымен тұғырлы, елтаңбасымен еңселі, әнұранымен айбатты»

Рашид Аюпов түркістандықтарды 4 маусым — Қазақстан Республикасының Мемлекеттік рәміздері күнімен құттықтады. Аталмыш жазбаны Түркістан әкімі фейсбук парақшасында жариялаған, — деп хабарлайды «Айғақ» ақпарат тілшісі.

«Тұңғыш Президентіміз Н. Ә. Назарбаев: «Біз тәуелсіздікке аңсап, зарығып жеттік. Енді сол тәуелсіздіктің қасиетті белгілерін де ерекше қадірлеуіміз керек. Әрбір азамат Қазақстанның Туын, Елтаңбасын, Әнұранын тұмардай қасиет тұтуы қажет. Елдігіміздің сыналатын бір тұсы – осы» — деген болатын.
⠀
Биыл елдігімізді айқындайтын мемлекетіміздің басты нышандарының қабылданғанына 28 жыл толып отыр. Бүгінгі күнге дейін, аспан көк Туымыз ғаламшардың ең биік шыңдарына тігіліп, шексіз ғарышта да көрінді. Оң қолымызды жүрек тұсына қойып, «Менің Қазақстанымды» шырқағанда, ерекше бір сезімге бөленесің. Ал, Елтаңбамыз ел тарихынан сыр шертіп, ұлттық рухымызды асқақтатып келеді.
⠀
Рәміздер өскелең ұрпақтың бойына отансүйгіштік сезімін ұялатып, патриотизмге үндеп, батылдыққа тәрбиелейді. Сондықтан да кейінгі жас буын осы рәміздерді бойтұмарындай қастерлеп, ерекше құрмет тұтуы тиіс. Бұл әрбір азаматтың Отан алдындағы басты міндеті деп білемін!
⠀
Баршаңызды 4 маусым — Қазақстан Республикасының Мемлекеттік рәміздері күнімен құттықтаймын! Туымен тұғырлы, елтаңбасымен еңселі, әнұранымен айбатты Тәуелсіз еліміз мәңгі жасай берсін!
⠀
Құрметпен, Рашид Аюпов» — делінген.

Еске сала кетейік, 1992 жылғы маусым айының 4-ші жұлдызы Қазақстан Республикасы тарихындағы ерекше мәртебелі күн. Бұл күн еліміздің мемлекттік рәміздері — Туы, Елтаңбасы, Әнұраны — дүниеге келген күн ретінде мәңгі есте қалады.