Бүгін, 18 наурыз күні Түркістан облысының әкімдігінде Коронавирустың таралуының алдын алу шаралары бойынша арнайы брифинг болып өтті. Брифингті Түркістан облысының бас санитарлық дәрігері, яғни облыстық тауарлар мен көрсетілетін қызметтердің сапасы мен қауіпсіздігін бақылау департаментінің басшысы Нышанов Нұрбек Садықбекұлы, Түркістан және Кентау қалалық ауруханаларының бас дәрігерлері Ділдәбеков Жанболат Бердібайұлы мен Сыздықова Гүлбану Жұмағалиқызы өткізді.
Қазақстан Республикасының Президенті Қасым-Жомарт Тоқаевтың Жарлығымен 16 наурыздан бастап Елімізде төтенше жағдай енгізілуіне байланысты негізгі жауапкершілік денсаулық сақтау саласына жүктеліп отырғаны мәлім. Ал «Түркістан және Кентау қалалық ауруханалары төтенше жағдай талаптарына сай медициналық қызметтерді көрсетуге дайын» дейді аталмыш мекемелердің бас дәрігерлері. Атап айтқанда, ауруханаларда оқшауланған арнайы орындар, қажетті дәрі-дәрмек қоры жеткілікті. Медициналық қызметкерлер індетпен қалай күресу керектігі және оның алдын алу жөнінде арнайы даярлықтан өткізілген.
Бүгінгі күнге Түркістан облысында коронавирус індетін жұқтыру жағдайы тіркелмегендігін айтқан Түркістан облысының бас санитарлық дәрігері Н.Нышанов Нұр-Сұлтан және Алматы қалаларында карантин режимі енгізілуіне байланысты туындап отырған жаңа міндеттерге тоқталды. Енді облысымызға сырттан кіретін азаматтар арнайы тексеруден өткізіледі. Яғни, облысымызға Жамбыл және Қызылорда облыстарынан кіретін жолдарға арнайы бекеттер орнатылып, тиісті сақтық шараларын атқаратын болады. «Облысымызға сырттан кіретіндер де өз еліміздің азаматтары, олардың дені облысымыздың тұрғындары. Сондықтан бұған бола алаңдайтындай ештеме жоқ. Тек сақтық үшін оларды арнайы құрылғылармен тексеріп және науқас адамдармен байланыста болған-болмағандығын сұрап, анықтаймыз. Індет белгілері анықталғандары болса ғана олар оқшауланып, арнайы дәрігерлік бақылауға алынады» дейді облыстың бас санитарлық дәрігері.
«Құдай сақтанғанды ғана сақтайтындығын» әр кез есте ұстауға тиіспіз. Әсіресе, тап қазіргідей уақытта. Өйткені «Сақтықта қорлық жоқ».
«Айғақ-ақпарат»