Коронавирустық инфекция тіркелген елдерге баруды жоспарлап отырған азаматтарға КЕҢЕС

Әлемде әлі де жаңа коронавирустық инфекция таралуда. Биыл 27 ақпандағы жағдай бойынша, 81 мыңнан астам адам аталған инфекцияны жұқтырған және 2 мың 806 науқас қайтыс болған, — деп хабарлайды Қазақстан Республикасының Денсаулық сақтау министрлігінің баспасөз қызметі.
Індет, әсіресе, Оңтүстік-Шығыс Азия елдерінде өршіп тұр, ару-сырқау мен өлім-жітімнің 99 пайызы осы өңірге тиесілі, мұнда инфекция тез таралуда.

Мәселен, Қытай Халық Республикасында 78 мың 497 ауру және 2 мың 744 өлім жағдайы, арнайы әкімшілік аудандарында Гонконг пен Макаода 89 және 10, Тайваньда 32 жағдай тіркелген.

Оңтүстік Кореяда эпидемиологиялық жағдай күрт шиеленісіп, 1 мың 261 жағдай тіркеліп, 12 адам көз жұмған. Соңғы күндері тағы 115 азамат сырқаттанған. Жапонияда да науқастар саны артып келеді, онда 172 адам коронавирус жұқтырған және 3 адам қайтыс болды, Сингапурда – 93, Таиландта — 40 ауру анықталды.

Сондай-ақ, соңғы күндері Италияда ауырғандар санының күрт өсуі байқалады, онда 470 оқиға анықталды, оның 12-сі өлім-жітіммен және Иранда — 139 оқиға, оның 19-ы өліммен аяқталған.

Жаңа коронавирустық инфекция бойынша эпидемиологиялық қолайсыз жағдайға байланысты ҚР Денсаулық сақтау министрлігі Қазақстан Республикасының азаматтарына Гонконг және Макао, Тайвань, Оңтүстік Корея, Италия, Жапония, Иран, Сингапур, Таиланд және Малайзия арнайы әкімшілік аудандарын қоса алғанда, Қытай Халық Республикасына жол жүруден бас тартуға кеңес береді.
Сақтық шаралары жаңа коронавирустық инфекциядан келген қауіпті айтарлықтай төмендетуге септігін тигізеді.