Өткенге есеп, болашаққа жоспар

Ордабасы ауданының әкімі Әліпбек Өсербаев 2019 жылы атқарылған жұмыстар бойынша халыққа есеп беруді бастады. Алғашқы есеп ауданға қарасты Шұбар ауылында өтті. 

Түркістан облысы көлемінде өнеркәсіп және кәсіпкерлік саласы дамыған өңірдің бірі саналатын Ордабасы ауданының жалпы өнім көлемі 79,2 млрд. теңгені құраған. Өткен жылмен салыстырғанда 117% пайызды құраған. Оның ішіндегі ең көп түсім ауыл шаруашылығының үлесінде — 43 млрд. 931 млн. теңге. Одан кейінгі орын өнеркәсіп саласына тиесілі — 19 млрд. 251 млн. теңге. Қалған қаржыны құрылыс және тауар айналымы салалары толтырған. 

Бүгінде Ордабасы ауданында 9 түрлі өнеркәсіп түрі жұмыс жасауда. 2020 жылға инвестициялық құны 97 млрд. 474 млн. теңге болатын 4 жоба қолға алынуда. 

Экспорт саласына келетін болсақ, 2019 жылы экспортқа өнім шығарушы кәсіпорындардың саны 11 бірлікті құрап, олармен жыл көлемінде 5 млрд. 404 млн. теңгеге экспортқа өнім шығарылды. 

Импорт: 2019 жылдың есепті кезеңінде ауданға 15 шағын және орьа бизнес өкілдерімен жалпы құны 511 млн. теңгеге импорт тауарлары енгізілді. 

Өткен жылы ауданның 55 жылдық мерей тойын өткізген Ордабасы өңірі 55 іс-шара ұйымдастырды. Ал, алдағы уақытта 2021 жылы Қажымұқан Мұңайтпасұлының 150-жылдық мерей тойын атап өту жоспарлануда. 

Осы және өзге де саладағы атқарылған жұмыстарға толық тоқталған әкімге есеп соңында халық тарапынан ешқандай сұрақ қойылмады, мәселе көтерілмеді. Керісінше, Шұбар ауылының қариялары ақ батасын беріп, алғысын білдірді. 

Дәл осындай есеп беру Ордабасы ауданына қарасты Шұбарсу ауылында жалғасты. Мұнда да өткен жылы атқарылған жұмыстар мен болашаққа құрған жоспарар түгел айтылып, халыққа таныстырылды.