Төлепов тұңғыш рет есеп берді

Шымкент қаласында мәселесі шешілмеген елді мекеннің көпшілігі Абай ауданына тиесілі. Тұрғыны да, әкімі де басқатыратын жағдай — инфрақұрылымға келіп тіреледі. Бұрын Төлеби ауданының қарамағында болған Ақжар аймағының тұрғындары қазір қандай күй кешіп отыр? Мегаполистің құрамына өттік деп қуанған ағайынның қуанышы ұзаққа созылды ма? Сұраққа осыдан төрт ай бұрын қызметке келген Абай ауданының әкімі Ғалымжан Төлепов жауап берді.

Ғалымжан Әнуарұлы 1983 жылы дүниеге келген. Бұған дейін Қазығұрт, сосын Төлеби ауданы әкімінің орынбасары болған бұл азамат қазір Абай ауданын басқарып жүр. 322 911 тұрғыны бар аймаққа әкім болып келген Төлепов тұңғыш рет есеп берді. Кездесу Ақжар тұрғын алабындағы №122 мектепте ұйымдастырылған. Жиынды қадағалау мақсатында Шымкент қаласы әкімінің бірінші орынбасары Мұрат Әйтенов келді.

 Өткен жылдың жұмысы түйінделгеннен кейін қариялар мінберде тұрған әкімді түсіріп, көсегең көгерсін деп әуелі бата берді.

Баталы ер – арымас. Қалай дегенмен жақсы сөз — жарым ырыс ғой. Аузы дуалы ақсақалдар жас әкімді осылай қанаттандырып, сосын істің биссимилиясына кірісті. Батпақ жол, көңілі көншімесе өшіп қалатын жарық, тозығы жеткен әлеуметтік нысандар көтеріліп, от жағып, күл шығарып жүрген аналарымыз дамыған ХХІ ғасырды сезіндіруді өтінді. Әдеттегідей, қоғамдық көлік — Шымкенттің басты мәселесі.

Әкімдердің есебіне көбінесе мектеп мұғалімдері, ауыл билері, белсенді қоғам мүшелері қатысады. Ал, өзекті мәселесі мен айтары бар тұрғындар дұрыс естімей қалдық деп жататыны бар. Бірақ газет беттеріне есептік кездесудің күні мен уақыты жарияланып жүр. Сондықтан, осы жағдай аясындағы өкпе-наз орынсыз деп билік өкілдері бірден өздерін ақтап алды.

Шымкент қаласында 29 депутат бар. Бірақ олардың қайсысы сайланғанша сұңқардай көрініп, сайланған соң құзғындай жоқ болғанын білмедік. Дегенмен, сол халық қалаулылары есептік кездесуде бой көрсетсе орынды болар еді. Қанша дегенмен билік пен халықтың ортасындағы көпір емес пе? Сонымен №73 мектептің маңындағы көпір қаржы болғанда шешілетін болды. Мұнда учаскілік полицейлерін танымай жүрген тұрғындардың мәселесі қашан шешілер екен.

Абай ауданының әкімі Ғалымжан Төлепов қазынадан қаржы қаралса, жүгенді жоба жүзеге асады деп есептік кездесуді аяқтады. Уақыт еншісіне қалдырайық. Еңбек жолын 2006 жылы бастаған бұл әкімді алда талай сынақ тосып тұр. Ер мойнында қыл арқан шірімес.