Еліміздегі үшінші мегаполис жұрты 1 желтоқсан — Қазақстан Республикасының Тұңғыш Президенті күні мерекесін тойлады. Мерекелік іс-шара қала әкімі Ерлан Айтахановтың қатысуымен өтті. Шараға шақыртылған қонақтарға арнайы 11 этно-мәдени бірлестік кәсіпкерлерінің көрмесі ұсынылған болатын. Көрмеге қойылған қолөнер туындыларын тамашалап, бармағынан бал тамған асыл әжелердің бауырсағынан ауыз тиді.
Қазақи нақышта, нағыз өнер туындылары ұсынылған көрме концерттік бағдарламамен ұласты. Қала әкімі көрермендерге арналған ыстық лебізін білдіріп, құттықтау сөз сөйледі.
Тұңғыш Президент күні мерекесі — барша қазақстандықтар үшін жалпыхалықтық мерекеге айналды. Мерекенің дәл осы күнге қойылуының да өзіндік себебі бар. Бұл күн еліміздің өркендеп, көркеюіне кемеңгер саясаты арқылы аса зор үлес қосқан Елбасы Н.Ә.Назарбаевтың құрметіне қойылған. Сонымен қатар, осындай айтулы күнді мемлекетіміздегі ең ірі мегаполистердің қатарына кірген Шымкент қаласы да атап өтіп жатыр. Миллионнан астам тұрғыны мен жүзден астам этнос өкілдері тұратын қалада қазірде ауқымды шаралар мен игілікті істер орындалуда.
Өнер жұлдыздарының қатысуымен өткен салтанатты іс-шара барысында патриоттық тақырыптағы әндер шырқалды.»Өнер» мектебінің ұжымы мен «Қазына» би ансамблі өнер көрсетсе, эстрада әншісі Ғазизхан Шекербеков репертуарындағы «Аға» әнін орындады.
Сондай-ақ, мерекеге орай бірқатар азаматтар қала әкімінің Алғыс хатымен марапатталды. Оның ішінде Елбасының курстасы Аманәлі Әбдіраманов та бар.
«Айғақ» ақпарат
