Жағдайды ушықтырған «жабайы сауда»

Жабайы сауда жағдайды ушықтырып жіберді. Қырғы базардағы заңсыз сауда билікте әкімдер ауысқан сайын қозғалатын тақырып. Бірақ, бұл жолы мәселе тым басқаша. Ретсіз сауданың ордасына айналған Қырғы базардың алдын абаттандырмақ. Осыған байланысты билік қызыл лентаны белшесінен басып тұрғандарды базардың ішіне көшірмек. Алайда, сіз бен біз тұрып жатқан мегаполистің көркеюіне саудагерлер көнбей отыр.

Негізі Әл Фараби ауданы әкімдігінде қала әкімі Ерлан Айтаханов Қырғы базардың саудагерлерімен жүздесу керек болатын. Бірақ ала дорба арқалағандар келмей қалды. Әкім мәселеден қашпай, бетпе-бет жүздесуді жөн көрді. Бірден адам қарасы үзілмейтін базарға барып, ашуға булығып тұрған азаматшалардың ортасына кіріп кетті. Әрине, жабайы тіршілікпен жан баққандар бала-шағаның қамы үшін биліктің өкілдерін жағадан алып, айқайға басты.

Сатушылардың көпшілігі әйел азаматшалары. Бірін несие мазалап жатса, енді бірін тауардың мерзімі ойландырып тұр. Түптеп келгенде барлығының мақсаты бала-шағаны бағу. Түсінікті. Бірақ заңды бұзуға болмайды. Билік басшылары бұл саудагерлерді сыртқа сүйреп жатқан жоқ, керісінше базардың ішінен жәй беріп отыр. Екі ай тегін тұрғызуға да уәде берді. Бірақ, ретсіз саудада жүргендер оған да келіспеді. Қырғы базардың сыртында қалтадан салыққа қаржы шығармай, сыртта тұра бермекші.

Жұрт  жайма базардың арзандау тауарына үймелеуге үйреніп кеткен. Бірақ, «арзанның сорпасы татымас» деген сөзді ескерген де жөн. Күннің астында, көшеде көтерілген шаңның ортасында тұрған азық-түліктің сапасы қандай екеніне көпшілік мән беріп жатқан жоқ. Бағасы қолайлы тауарды тұтынам деп, баға жетпес денсаулығыңыздан айрылып жатпаңыз. Жә, жарайды. Көтерілген мәселенің ортасына қайта кірейік. «Саудагерлер нәпақамызды тартып алды»-, деп Қырғы базардың ортасында қырғын салып, айқайға басып шулады. Әкім Ерлан Қуанышұлы бұл даудан сытылып кетпестен, ортасында тұрып шексіз ойдың шешімін айтты.

Сабыр түбі — сары алтын. Байбалам салғаннан гөрі, билік пен ретсіз сауданың кейіпкерлері келісімге келген әлде қайда тиімді. Әр нәрсенің өз орны мен уақыты бар. Міне, жабайы сауданы жинастыратын мерзімде жетті. Бұрынғыдай бұл жәй Шымкент емес, үшінші мегаполиске айналған аймақ. Бұл аз десеңіз келер жылы Шымкент ТМД-ның мәдени астанасы болмақ. Осыған дайындық қазірден басталды. Базар маңдарын көркейтіп, көрінісін көзге келбетті ету жоспарда. Ол үшін сіз де, біз де қарап жатпай үлес қосайық. Әркім өз мүддесі үшін айқаспай, ынтымақта болған абзалырақ. Әкімнің осы ойын түсінген саудагерлер соңында күлімдеп, мәмілеге келе бастады.

Жырға айналған жабайы сауда осылай жылда көтеріліп жүр. Бірақ «наным бар, наным бар дегенше, жеп тынған артық». Қызыл лентадан асып, мегаполистің көркін құртып тұрған ретсіз тіршілікті уақытында тоқтатқан дұрыс-ау. Сонда сауда соңында қалатын қоқыста тазарып қалар еді.

«Айғақ» ақпарат