Шымкент қаласының жастары үстіміздегі жылдың 18-25 тамыз аралығында Қытай еліне танымдық сапар жасап қайтты. Жастар жылына орай ұйымдастырылған ауқымды сапарға сан түрлі саланың 40-тан астам жас мамандары қатысты. Ақпараттық қолдау көрсету үшін «Айғақ» телеарнасының жас журналисі, «Шетелдегі қандастар» хабары арқылы көрерменнің көзайымына айналған Тоғжан Нарбай арнайы шақырту алды. Тоғжан — Әл-Фараби атындағы Қазақ Ұлттық университетінің түлегі, оңтүстіктен солтүстікке көш бойынша еліміздің Павлодар, Қостанай, Солтүстік Қазақстан, Ақмола, Шығыс Қазақстан облыстарында болып, арнайы танымдық бағдарлама дайындаған. 2019 жылы Алматы қаласында өткен Еуразиялық Медиа Форумның талқылау алаңынан репортаж дайындаса, ел астанасында ұйымдастырылған «Nur Otan» Партиясының XVIІI съезінде тікелей қосылым арқылы ақпарат таратты. «Айғақ» телеарнасының арнайы жобасы «Ұлы бабалар ізімен…» циклді бағдарламасының негізінде Ресейдің Орынбор қаласында, Өзбекстанның Ташкент, Самарқанд, Бұхара қалаларында, Тәжікстанның Душанбе, Ходженд, Истаравшан, Бохтар қаласы мен Гаравути елдімекеніне сапарлатып, танымдық дүниені көрермен назарына ұсынды. Ходженд — Шымкентпен бауырлас қала. Сондықтан да, екі қаланың әдеби, мәдени, экономикалық байланыстарына сараптама жасап, көрсете білді.
Иә, Шымкент қаласы әкімдігі мен Қазақстандағы Қытай елшілігі арасындағы келіссөз арқылы мегаполис жастарына аспан асты елін көру бақыты бұйырыпты. Қытай халқының бас қаласы Бейжің қаласынан бастау алған танымдық экскурсия бірнеше нысандармен танысты. Соның бірі – «Арман қорабшасы».
Бұл нысан нағыз шығармашылық орталық. Неге десеңіз, мұнда кішкентай балалармен қатар қарттар да келіп, шығармашылықпен айналысады.
Яғни, сурет салады, би билейді, қысқасы уақыттарын тиімді өткізеді, өздерін әрқашан дамытудан тоқтамайды. Бұл Қытай халқы үшін таңсық дүние емес. Өйткені, қайда көз салсаңыз да бос отырған жанды таппайсыз. Кем дегенде, шахмат ойнап отырады.
Мұнан соң «Аспан храмымен» таныстық. Қытай мемлекеті мемлекет болып қалыптасқалы болып жатқан өзгерістерге куә болған дәл мынадай алаңдарда тарих құшағына еніп кете бересіз. Бір кездері кіруге адам баласының дәті бармайтын императорлар сарайының қақпасы дәл қазір айқара ашық.
Мұнда келуші туристердің де Қытай халқының да саны басым. Ағаштан салынған сарайларға бір шеге қағылмаған. Шеберлікпен тұрғызылғандықтарына еріксіз таңдай қағасың. «Аспан храмында» император аспан әкесі және жер анасымен тілдесетін көрінеді.
Ерекше атап өтетін жайт, мұнда көтерілетін баспалдақтардың бірінде тұрып, сыбырлап айтқан сөзің, храм салынған алаңның екінші жағынан анық естіледі екен. Әлі күнге дейін мұның қалай жасалынғанын ешкім таппаған. Оған тіпті бүгінгі қытайлардың өзі таңқалады.
Әрине, Қытай елі жайлы сөз қозғағанда, «Ұлы Қытай Қорғанын» айтпай кету мүмкін емес. Аспан асты елінің символы әрі көрікті орындарының бірі емес пе? Мұны әрбір шетелдік турист біледі.
