Шымкент қаласының әкімі Ғабидолла Әбдіраxымов мегаполистегі тұрғындарды бірлесіп жұмыс істеуге шақырып отыр. Қазақтың «Бірлік бар жерде — тірлік бар» деген қанатты мақалын тілге тиек еткен ол — сенім керек дейді. Мегаполис мэрі Қазақстан xалқы Ассамблеясының сессиясында ойында жүрген мәселелердің барлығын жайып салды. «Қоғамдық келісім формуласы: бірлік пен жаңғыруға» тақырыбында өткен жиында қазақ xалқына мың алғыс айтқандар көп.
Еліміздің бас қаласы Нұр-Сұлтанда өткен Ассамблеяның XVII сессиясына Шымкенттен 26 өкіл қатысқан болатын. Сол басқосу бұл жолы мегаполисте жалғасын тапты. Көп ұлттың шоғырланған шаһарында өткен Ассамблея отырысы бұл жолы жиылған жұртқа бір серпіліс берді. Мінберге шыққандардың көпшілігі қағазға үңілмеді, баяндамаға аса қатты мән бермеді. Жүрекпен сөйлеп, көкейінде жүрген пікірлерін айтты. Мәселен, Ғабидолла Раxматоллаұлы баяндамаға қарағанда, жиылған жұртқа тіке қарап өз ойын ашып айтқаны көңілге жылу ұялатты.
Шымкентте 130-дай мектеп болса, соның 70-і түрлі ұлттың тілдерінде білім береді. Және барлық этно өкілдеріне тілін, салт-дәстүрін сақтап қалуға мүмкіндік жасалған.
Сондай-ақ, биыл қалада жастар мәслиxаты құрылып, онда барлық ұлттың үздік жастары сайлана алады. Қала әкімі осыны алға тарта отырып, біз керемет елде өмір сүріп жатырмыз дейді. Бірнеше шет мемлекетте болып, олардың өмірімен таныс болған әкім Қазақстан нағыз еркін, өмір сүруге лайықты жер екенін қуана жеткізді. Қасиетті Рамазан айында дүйім жұртты шүкірлік етуге шақырды.
Миллион тұрғыны бар Шымкент қаласы әкімдігінде қанша қызметкер жұмыс істейтінін білесіз бе? 700 мемлекеттік қызметкер халыққа қызмет етеді екен. Бұл көп емес. Керісінше жетіспейді дейді мегаполистің басшысы. Мемлекеттік қызметкерлерге дүрсе қоятын тұрғындарға Әбдірахымов өтініш айтты. Оларда біреудің аялап отырған ұлы мен қызы, ата-анасы. Сондықтан өмір – өзен деп аталатын бұл жалғанда бір-бірлеріңізді сыйлай біліңіздер, кешірімді болыңыздар. Бұл мегаполис басшысының тұрғындарға өтініші болатын.
Қазақстан халқы Ассамблеясының I сессиясында сөз алып, мінберге шыққан этнос өкілдер қазақ халқына алғыс айтумен болды. Бір кездері тағдырдың басқа жазған тартуымен департацияға ұшырап, қонысын Қазақстанға көшіргендер түрлі сынақтан өткен. Ата-бабаларымыздың кең пейлі мен ынтымағының арқасында аман қалғандар өткен оқиғаларды еске алап, ішкі сырымен бөлісті.
Шымкенттің әл-ауқаты жыл сайын көтеріліп келеді. Қазынаның бюджеті биыл 200 млрд. құраса, келер жылы 300 млрд. жетеді деген болжам бар. Сондықтан жағдай жақсарады дейді. Шымкенттің әкімі дәл осы басқосуда жақсы пікірлерімен бөлісті. Әр адам өмірінде қателеседі. Бірақ кешірімді болуымыз керек. Татулық — табылмас бақыт. Сондықтан сізде, бізде бақытқа, жетістікке бірге жетуге талпынайық. Бұл Шымкент қаласы әкімінің түйінді ойы болатын.
