ҚР Тұңғыш Президенті қорының баспасөз қызметінен мәлім еткендей, шараның мақсаты — қайырымдылық идеясын насихаттау және азаматтық бастамаларды белсенді дамыту. Байқауға өтінім төрт ай бойы, яғни 2018 жылғы қарашадан бастап 2019 жылғы ақпанға дейін еліміздің барлық облыстарынан қабылданды. Және оған әлеуметтік, қоғамдық проблемалардың шешілуіне өз үлесін қосып жүрген және қайырымдылық жасап, игі істермен айналысатын адамдар қатысты. Марапаттау салтанаты бүгін Астанада өтті. Оған ҚР Парламенті Сенатының депутаты, ҚР Тұңғыш Президенті — Елбасы қорының директоры Дариға Назарбаева, сондай-ақ көрнекті қоғам қайраткерлері, ҚР Парламентінің депутаттары, ҮЕҰ өкілдері, меценаттар қатысты.
«Бұл шараға еліміздің түкпір-түкпірінен 97 адам қатысты және бұл тек басы ғана. Біз жеңімпаздарымызды ірі мегаполистерден де, кіші ауылдардан да іздедік. Олар елдің болашағына алаңдайтын, қиын жағдайда қол ұшын созуға дайын қарапайым адамдар. Сіздердің есімдеріңізді әр қазақстандық білуі тиіс. Сіздерге қарап жастар бой түзесін. Отандастарымыз үшін сіздер секілді адамгершілігі мол азаматтарды үлгі етіп көрсету біздің мақсатымыз», — деді Д. Назарбаева. Сонымен «Қайырымдылық керуені» байқауының жеңімпаздары бес номинация бойынша анықталды: «Асар» аталымында Қарағанды облысының тұрғыны Сымбат Елікбаева жеңімпаз атанды. Ол терімен жұмыс істейді, ұлттық нақышта зат шығарады. Сымбат үнемі балалар үшін ақысыз шеберлік сабақтарын ұйымдастырады;
«Туған жер» номинациясында Атырау облысының тумасы Арман Хайруллин жеңіске жетті. Арман табиғатты қорғауға атсалысып жүрген азамат. 2017 жылы Атырау қаласында көшеттерді тарату және отырғызу бойынша (10 мың көшет) акция ұйымдастырды. «Жасыл» бастамаларды одан әрі жалғастыру мақсатымен «Атамекен Эко» қоғамдық қорын құрды; «Батыл жүрек» номинациясында ақмолалық Ұлдана Совет жүзден жүйрік шықты. Жеңімпаздың жасы небәрі — 10-да. Ол 2017 жылғы қарашада жанып жатқан үйден кіші інісі мен екі сіңлісін алып шыққан;
«Мейірім жолында» номинациясында Алматы қаласының тұрғыны Расима Темербаеваның еңбегі еленді. Ол жасы мен денсаулығына қарамастан, қарияларды күнделікті тамақтандырады. Бүгінде оның күніне 400 түскі асқа арналған екі тамақтандыру орны қызмет етеді; «Қайырымдылық тарихы» номинациясында СҚО-ның тұрғыны Александра Кондратова жеңімпаз деп танылды. «Неделя СК» газетінде жұмыс істейтін журналист қиын өмірлік жағдайға тап болған адамдарға көмек сұрап, ондаған мақала дайындады. БАҚ-та көптеген мәселелердің көтерілуі арқасында мұқтаж адамдарға көмек көрсетілді.
Сонымен қатар, атаулы номинациялардан бөлек, Президент қорының арнайы сыйы тағайындалды. Біріне Равиль Насифулин ие болды. Ол қажетті құралдарды өзі сатып алып, ескі компьютерлік техникадан компьютер, ноутбук құрастырады. Кейін оларды жағдайы төмен, көпбалалы отбасынан шыққан, ата-ана қамқорлығынсыз қалған, мүгедек, ауыр дертке шалдыққан балаларға сыйлайды.
Келесі сыйлық Сайра Матайбаеваға берілді. Ол 2016 жылы өз қалтасынан 5 млн теңгеге, 2017 жылы 12 млн теңге сомасына қайырымдылық көмек көрсетті. Қазіргі уақытта оның көмегімен Астана қаласы іргесіндегі Қосшы ауылында 200 балаға арналған мектеп тұрғызылып жатыр. Онда әдетті сыныптардан өзге, ағылшын тілін тереңдетіп оқытатын сынып пен түрлі үйірмелер жүргізетін барлығы 12 кабинет ашылады деп жоспарлануда.
Жарыс жеңімпаздарына арнайы дипломдар, «Оқжетпес» емделу-сауықтыру кешеніне жолдамалар сыйға тартылды. Айта кетсек, бұған дейін ҚР Тұңғыш Президенті — Елбасы қорының және Қазақстанның іскер әйелдері қауымдастығының ұйымдастыруымен айтулы шараның басталғаны туралы хабарлаған болатынбыз.
Дереккөз: ҚазАқпарат.
