Желідегі темір өткізуші баланың отбасы жаңа үйге көшті

Әлеуметтік желіде тараған кішкентай баланың өз отбасын асырап отырғаны туралы видеоны көрген боларсыз. Әуесқой түсірілімнен 4 сынып оқушысының қажетсіз темірлерді жинап, одан түскен ақшамен шиттей 5 бауырын асырап отырғаны мәлім болады. Бұл видео барша мейірімді жандарды елең еткізбей қоймады. Қамқоршы азаматтар жұмыла ақша жинап, кішкентай батырдың отбасына баспана алып берді.  Видеоны түсірген азамат еңбекқор баланы біраз уақыттан бері бақылаған екен. Видеоның басты кейіпкері Ағабек ешқандай ұрлықсыз  өзінің адал еңбегімен тапқан ақшаны осылай үйіне апарып береді екен. Себебі, оны науқас анасы мен 5 бауыры жалдамалы аядай тар бөлмеде күтіп отыратын.

Одан қала берді, таңғы уақытта сабағына да барып үлгереді. Жасының кішкентайлығына қарамастан жұмыс жасайтын Ағабектің отбасын әкесі осыдан үш жыл бұрын тастап кеткен. Одан бөлек, үлкен 18 жасар ағасы да мұндай үйде тұра алмайтынын айтып кетіп қалған. Ал, Ағабек өзінің анасы мен бауырларына ондай қиянат жасай алмай, керісінше оларды асырауға бел буған. Бүгін міне, жасөспірімнің жасаған ерлігін көрген мейірімді азаматтар жан-жақтан қаржы аударып жаңа баспана алып берген. Батырға көмек қолын созуға тіпті, шет елдік азаматтар да ниет білдірген. Ағабектің анасы жүрегі жұмсақ, жомарт жандарға үлкен алғысын білдіреді.      

Түсірілім тобы барғанда Махабат апай өзінің 5 баласымен бүгін жүгін түйіп, ерекше толқып отыр. Олар мына қараңғы, тар және суық үйден кететініне қуанышты. Бұл үйдің өзіне олар ай сайын 13 мың теңге төлеуге тиіс болатын. Бірақ, қаржыдан қысылған отбасы үй иесіне 90 мың деңгеге жуық ақша қарыз. Оны да жиналған қаржыдан төлеп береміз дегенде, үйдің иесі бірден пайдасын асырып 150 мың теңге қарыз деп шағады. Ал, үйді сатып аламыз дегенде 10 млн-ға бағалаған. Оны  видеодан анық естуге болады. Енді, міне бүгін бәрі артта қалып жаңа баспанаға көшейін деп жатар. Ал мына ескі баспаналарына қайта оралмастай етіп, қатты жауып, үлкен құлып салды.Осы қайырымдылықты жасаған азаматтар енді дәл осындай баспанаға мұхтаж басқа да отбасыларға үй алып бермек ниетте. «Жұмыла көтерген жүк жеңіл» дегендей, әрқайсымыз аз болса да игілікті іске жұсмсасақ, жақсылық Жаратқаннан қайтары хақ. «Көп түкірсе көл» демекші жұрт болып жұмылып, жақсылық жасауға асығайық ағайын.

«Айғақ-ақпарат».