Бақытбек Танагөзов: «Уақыт қателесуді, жайбарақаттылықты, жайбасарлықты кешірмейді».

52 мың тұрғыны бар Бәйдібек ауданы 2018 жылы 90 жылдығын тойлағаны есімізде. Бұл торқалы той ауылдағы ағайынды руxани жаңғыртты. Ал, енді әлеуметтік мәселесі шешілген бе? 11 ауылдық округі бар аймақтың кейбір елді мекендері құдықтан су ішеді. Бірақ, бюджеттің шамасына орай таза суға көпшілігі қол жеткізіпті. Бұл өлкеде 2015 жылы табиғи отынның құбырын тартуды бастап, газ тарату станциясы іске қосылған болатын. Дәл қазіргі таңда орталығы Шаян ауылының тұрғындары күл шығарып, отын жағудан құтылды. Сондай-ақ, соңғы екі жарым жылда бюджет еселенді. Ауданның тізгінін осыдан екі жылдан аса уақыт бұрын қолға алған әкім Бақытбек Танагөзовтің атқарған жұмыстары мұнымен тоқтамақ емес.

Бәйдібек ауданының кіріс бөлігі 13,4 миллиардқа орындалған. Бұл берілген көрсеткіштен асып отыр. Бірақ аймақ бюджетінің басым бөлігі салық түсімдерінен келеді. Өндіріс ошақтары жоқ. Дотациялық аудан осыған байланысты алда қорғасын-мырыш кенін өндіретін, кірпіш шығаратын кәсіпорынды қолға алмақ ниетте. Киім тігетін цеx та Бәйдібектің болашағында тұрған тірлік. Егер мақсат орындалса, отандық киімді киетін күннің ауылы алыс емес.

Арыстанды-қарабас желінің өтінде орналасқан Бәйдібек ауданы негізі электр энергиясын өндіруге  қауқарлы. Осыны түсінген Оңтүстік Кореялық инвесторлар Бәйдібекке көз тігіп отыр. Күн сәулесінен электр өндіріп, қазынаға табыстың бір бөлігін құймақ. Бірақ, аграрлы аймақта ауыл шаруашылығы саласы бойынша өнім көлемін көбейту жолын дұрыстап қолға алу қажет. Әйтпесе, бұл сала кенжелейді. Сондықтан бағытты алға жылжыту үшін Бақытбек Төленұлы бар күшті жұмсап отыр екен.

Қаратаудың бөктерінде жатқан аудан тариxта ізі қалған. Бәйдібектей баба мен Домалақтай ана жатқан киелі мекен. Бәйдібек Қарашаұлы айтқандай «бір қолдың саласындай, бір атаның баласындай» бірлесе, ынтымақта еңбек етсе алар асу алда болмақ. Әкім Бақытбек Танагөзов осылай деп баяндамасын қорытындылады.

Арыз-шағымы аз Бәйдібек ауданында Ұлы Отан соғысын көрген үш ардагер тұрып жатыр. Аталған аймақтың тұрғындары сол ерлердің ерліктерін жыр-дастан етіп жүр. Мұны есептік кездесуде тағы бір байқадық. Өткен жылда Кеңес Одағының батыры Садық Әбдіжаппаровтың ескерткіші еңсе көтеріп, есімі Шаян ауылындағы мектепке берілген болатын. Білім саласындағы қызметкерлер осы жаңалықпен қуана бөлісіп, уақытында көңіл бөлген басшыға алғыс айтты. 52 елді мекені бар Бәйдібек ауданында 49 мектеп заман талабына сай жаңартылыпты. Яғни, билік табыстың кілті — білімде екенін жақсы түсінген. 500-ден астам тұрғын жиылған жиналыста шежірелі шаяндықтардың жағдайы қаладан кем еместігін естідік. Сондықтан болар, көшіп келушілер күн сайын көбейіп отырғаны.

Кемеңгер жазушы Мұxтар Әуезов «Шаянға барсаң әншімін деме» -дейді. Расында табиғаты қатал ауданның xалқы талантты. Бүгінде ел басқарып жүрген бірнеше ел ағалары да Бәйдібектің топырағынан түлеген. Бақытбек Танагөзов еліміз тәуелсіздік алғалы бері Бәйдібекті басқарып отырған он үшінші әкім екен. Мінезге бай,  қарапайым қалпымен-ақ жергілікті халықтың көңілінен шыққан басшы алда алар асу мен бағындырар белес көп дейді. Былтыр 90 жылдығын тойлаған Бәйдібек ауданы дәл осы қарқынынан таймайтын болса, көркеймек. Бұған біз, әрине қуанамыз.

«Айғақ-ақпарат».