Бүгін ҚР Премьер-Министрі Бақытжан Сағынтаев биыл 30 қаңтарда Үкіметтің кеңейтілген отырысында Мемлекет басшысының алға қойған міндеттерін одан әрі іске асыру бойынша нақты тапсырмалар берді.
Ұлттық экономика министрлігіне Қаржы, Білім және ғылым министрліктерімен бірге және әкімдерге мектеп салу мен жөндеу функцияларын оларды қаржыландыру функцияларымен бірге өңірлерге беру мәселесін пысықтау тапсырылды. Бұл бюджет процесін оңайлатып, мектептерді салуды немесе жөндеуді жылдамдатуға мүмкіндік береді.
Медицина жұмыскерлерінің практикалық даярлығын күшейту үшін Денсаулық сақтау министрлігі практикалық дағдыландыруға назар аудара отырып, халықаралық стандарттар бойынша оқытудың қазіргі заманғы бағдарламаларына көшу жөнінде ұсыныстар енгізіп, әкімдермен бірге биыл мемлекеттік ауруханаларды меншікті клиникалық базалар ретінде медициналық жоғары оқу орындарына беру мәселесін пысықтауы тиіс.
Еңбек және халықты әлеуметтік қорғау министрлігі Ұлттық экономика, Қаржы, Білім және ғылым министрліктерімен бірге:
-
жұмыс істеп жүрген адамдарды үздіксіз оқытудың кешенді жүйесін іске қосуды (life-long learning) қамтамасыз етуі тиіс;
-
жұмыс берушілермен ынтымақтаса отырып, салықтық шегерімдерді кәсіпорындардың персоналын оқыту шығыстарына қолдану мүмкіндігін зерделеуі қажет;
-
қайта даярлау және біліктілікті жоғарылату курстарына ақы төлеудің ваучерлік негіздерін қарастыру қажет;
-
электрондық Еңбек биржасының негізінде кәсіптік дағдыға оқытатын, сондай-ақ «қажетті» дағдыларды үйрететін және алған дағдыларын жұмыс берушілер мойындайтындай сертификат беретін оқу курстарының ауқымды тізбесі бар Жалпыұлттық оқытудың онлайн-порталын іске қосуды қамтамасыз ету тапсырылды.
Ақпарат және коммуникациялар министрлігі мүдделі мемлекеттік органдармен бірге:
-
мемлекеттік органдарда қазіргі бизнес процестерді түбегейлі қайта қарау жөніндегі шараларды әзірлесін, ең алдымен қағаздан бас тартып, 2020 жылдан бастап толықтай электронды құжат айналымына көшуі қажет;
-
халыққа жүргізіліп жатқан реформалар туралы үнемі ақпарат беріп, кері байланысты қамтамасыз етуі қажет.
Ұлттық экономика министрлігіне Қаржы министрлігімен бірге:
-
әлеуметтік төлемдерді есептеу және еңбекақы төлеу қорынан бірыңғай төлем түрінде төлеу тәртібін оңайлату қажет;
-
жеке тұлғалар үшін жер салығы мен ондағы құрылысқа салынатын салықты жылжымайтын мүлікке салынатын бір салыққа қосу мәселелерін пысықтасын және көп пәтерлі тұрғын үйлерде жер салығын алып тастау мәселесін қарау тапсырылды.
Индустрия және инфрақұрылымдық даму министрлігі:
-
Денсаулық сақтау, Ауыл шаруашылығы министрліктерімен және «Атамекен» ұлттық кәсіпкерлер палатасымен бірге 2019 жылдың ортасына дейін «Сапалы Қазақстан» кешенді жоспарын әзірлеп қабылдасын, онда халықаралық деңгейге сәйкес келетін қазақстандық стандарттарды, техникалық регламенттер мен нормаларды 3 жыл ішінде енгізуді, заманауи зертханалық базаны дамытуды ескеруі тиіс;
-
Ақпарат және коммуникациялар министрлігімен, Назарбаев Университетімен бірге алдыңғы қатарлы ғылыми-технологиялық компанияларды құрылған инновациялық экожүйені, оның ішінде Astana Business Campus пен Astana Hub халықаралық АТ стартаптар технопаркін одан әрі дамытуға стратегиялық әріптес ретінде тартуды пысықтауы тиіс.
