Шардара ауданы бойынша 3 елді мекен (Қазақстан, Целинный, Ұзын ата) табиғи газ көзіне қосылған. Оларда тұратын халық саны – 13 730 адам (2026 үй), бұл аудан аудан тұрғындарының 17,3 пайызын құрайды. 2018 жылы «Газ тасымалдау жүйелерін дамыту» бюджеттік бағдарламасы бойынша 6 нысан құрылысы облыстық бюджет қаржысы есебінен жүргізілді. Атап айтар болсақ, Шардара қаласындағы ГРС №18 құрылысы мен Достық, Ақ алтын, Егізқұм, Қызылқұм, Сүткент ауылдарындағы ішкі газ жүйелерінің құрылыс жұмыстары жүргізіліп, 2019 жылға өтпелі болып отыр. Биылғы жылы қаладағы Өтеғұл елді мекенінен бастап газ жүйелерін тарту жұмыстары басталады деп күтілуде.
Елбасының «Ұлы даланың жеті қыры» мақаласы арғы тегімізді түгендеп, тарихымызды жаңғыртып, келер ұрпақ мақтанып айта жүретіндей жобаларды жүзеге асырғалы отыр. «Рухани жаңғыру» бағдарламасының жалғасы болатын Елбасының тарихи сананы жаңғыртуға бағытталған ұсыныстары мемлекетіміздің нығаюына септігін тигізеді. Өйткені, тарихын білген ел ғана өткеннен сабақ алып, жарқын болашаққа жол тауып жетістіктерге жетеді. Біздің ауданда да киелі жерлер қатарында бүгінгі күнге дейін бүтіндей сақталып келген орта ғасыр ескерткіштерінің бірі – «Ұзыната» кесенесі бай мұраларымыздың біріне саналады. Ежелгі аңыз-әңгімелерде Ұзын Атаның шын аты Асан Ата деседі. Атақонысы Ұзын Ата –тайпақ екен. Әрі сөзі дуалы Асан қария Ақсақ темірдің бас кеңесшілерінің бірі болса керек.Ұзын Ата Сыр бойын мекендеген халықтардың ыстық-ықыласына бөленгендіктен әруақты қария, ел атасы — әулие кісі атанған көрінеді. Ол зеңгі Атадан бата алған екен деген де сөздері ел аузында әлі күнге айтылып жүр.Ұзын-Ата күмбезі қай уақытта салыныпты дегенге келсек,біздіңше, ол XIV ғ соңына немесе, XV ғ бас кезіне сәйкес келеді.
Сонымен бірге тарихшы ғалымдардың дәлелдері мен дәйектемелері бойынша қазіргі Шардара ауданы орналасқан Сүткент, Жаушықұм, Ақтөбе 1, Ақтөбе 2 аймақтары, яғни Сырдария өзенінің ортаңғы ағысының жоғарғы бөлігі түркі тайпаларының мекені болған. Алдағы уақытта зерттеп-зерделеп, осынау асылдарымызды тереңнен аршып шығарып, халықтың кәдесіне жарата білу бүгінгі ұрпақтың парыздарының бірі болмақ.
Осы орайда ардагерлер қауымына да жүктелер міндет аз болмайды деп айтқан болар едім. Бүгінгі таңдағы біздің басты міндетіміз – терең білімді, жан-жақты жетілген, бәсекеге қабілетті озық ойлы ұрпақ тәрбиелеп шығару. Бұл ретте сіз бен біз болып атқаратын шаруа жетерлік. Әсіресе, жастар тәрбиесінде мән беріп қарайтын мәселе көп. Сайып келгенде жастарымыздың бірлік, ынтымақтастық туралы түсініктерін кеңейтіп, оларды көп ұлтты халқымыздың тыныштығы мен бірлігін нығайтуға атсалысатын азамат етіп тәрбиелеу баршамыздың міндетіміз!» — деген Шардара ауданының әкімі Болатбек Қыстауовтың 2018 жылы атқарған жұмыстары туралы толығырақ «Айғақ» телеарнасының «Ашық сұхбат» бағдарламасынан көріңіздер.