Шымкент қалалық мәслихатының алтыншы шақырылым депутаттарының ХІ сессиясында дендросаябаққа қоғам қайраткері Асанбай Асқаровтың есімін беру туралы ҚР Үкіметіне ұсыныс жіберілген болатын.
Қазақстан Республикасы Үкіметінің 2018 жылдың 23 қазанындағы №674 Қаулысымен Шымкент мемлекеттік дендрологиялық саябағына қоғам қайраткері Асанбай Асқаровтың есімі беріліп отыр.
Асанбай Асқаров (1922–2001) — 15 қыркүйекте Жамбыл облысының Меркі ауданындағы Меркі ауылында туған. Еңбек жолын 1939 жылы мектепте білім беру жүйесінде бастады.
1942 жылдан 1946 жылға дейін әскери қызметте болды.
1946–1951 жж. Меркі аудандық комсомол комитетінің бірінші хатшысы, облыстық комсомол комитетінің хатшысы, содан кейін Қазақстан ЛКЖО Жамбыл облыстық комитетінің бірінші хатшысы болып жұмыс істеді.
1954–1958 жж. Қазақстан Компартиясы Красногор, Меркі аудандық комитеттерінің бірінші хатшысы, халық депутаттары Жамбыл облыстық кеңесі атқару комитетінің төрағасы болып сайланды.
1959–1985 жж. Қазақстан Компартиясы Жамбыл, Алматы және Шымкент облыстық комитеттерінің бірінші хатшысы болды.
«Тағдыр», «Судьба», «Жұмақ пен тозақ жырлары» атты өлең кітаптарымен бірге «Ұлы Тұранның ұлдары», «Мен еліммен біргемін», «Өлмейтұғын артымда сөзім қалса» атты өсиеттер жинағы жарық көрген.
Социалистік Еңбек Ерінің Алтын Жұлдызымен, Ленин, Октябрь Революциясы, Еңбек Қызыл Ту ордендерімен, көптеген медальдармен марапатталған.
1979 жылы қоғам қайраткері Асанбай Асқаровтың басшылығымен құрылған бұл мекен қазіргі таңда қала тұрғындарының таза ауамен тыныстап, аптап ыстықта саялайтын демалыс орнына айналған.
117 гектарды алып жатқан Шымкенттегі Дендропаркте де 560 түрлі ағаш бар. Олардың ішінде сирек кездесетін «Қызғалдақ», «Аюбадам» секілді ағаштар мен «Виргин», «Батыс боз аршалары» бар.
