Бүгін Түркістан облысы әкімінің бірінші орынбасары Қайрат Нүкенов Шардара қаласындағы балық шаруашылығының жұмысымен танысты. Бүгінде еліміздің барлық аумақтарынан бөлек жақын және алыс жерлеріне өнімдерін экспорттап отырған шаруашылық өндірісін одан әрі дамытуды көздеп отыр. Шардара ауданының әкімі Болатбек Қыстауов 9 ай көлемінде атқарылған жұмыстарды да баяндап берді.
«Хамит» СТК-і балық өңдеу зауыты Шардара су қоймасындағы табиғат пайдаланушы балық аулау кәсіпорындары негізінде 2006 жылы құрылған. Бүгінгі таңда аталмыш кәсіпорын базасында филе, кептірілген, тұздалған балықты өңдеу және дайындау, қалдықсыз өндірісті қолға алу мақсатында балық сүйегінен ұнтақталған жем дайындау цехтары жұмыс жасауда.
Үш цехта екі ауысымда (смена) 220 адам жұмыспен қамтылған. Зауытқа қажетті шикізат Шардара су қоймасынан, Атыраудан, Аралдан тасымалданып, қайта өңделуде.
Шығарылатын өнім экспортқа Еуропа елдеріне бағытталған. Кәсіпорынға «Бизнестің жол картасы-2020» бағдарламасы аясында қажетті инженерлік-коммуникациялық инфрақұрылымдарын жеткізу жоспарланған.
Балық зауытының басшысы, Түркістан облыстық мәслихатының депутаты Бахытжан Серманизов жұмыс барысында мейлінше жаңа технологияны қолдануды мақсат еткен.
Есесіне қызметкерлердің де қолайлы жағдайын жасап отыр. Балық шаруашылығындағы басты жетістіктермен бұл күні облыстық мәслихаттың депутаты, Түркістан облыстық Қоғамдық кеңестің мүшесі Дулат Әбіш те танысып шықты.
«Айғақ-ақпарат»
