Түркістанда «Ежелгі Түркістан – Жаңа мүмкіндіктер» тақырыбында халықаралық форум ұйымдастырылады

Ағымдағы айдың 28-ші жұлдызында өңірімізде «Ежелгі Түркістан – Жаңа мүмкіндіктер» тақырыбында халықаралық инвестициялық және туристтік форум өту жоспарлануда. Түркістан облысының әлеуетін көтеретін тұңғыш іс-шара барысына қатысты брифинг өткізілді. Жиналыс барысында Түркістан облысы әкімінің орынбасары Ербол Тасжүреков жоғары перспективалы жобалардың жүзеге асырылуы мен туризм саласындағы оң өзгерістер туралы мәлімдеді.

Іргетасы енді ғана қаланып келе жатқан Түркістан облысы үшін халықаралық деңгейде ұйымдастырылған форумның алар орны ерекше. Бұл жоба арқылы шет елдік инвесторларды тарту арқылы өңіріміздегі сауда-экономикалық ынтымақтастық дамымақ. Сондай-ақ халықаралық ұйымдар мен сарапшылардың қатысуымен  жыл сайын өтетін нетворкингке арналған халықаралық алаңын құруға үлкен мүмкіндік тумақ.

Форум барысында логистика, туризм және агроөнеркәсіптік кешен саласындағы тақырыптар көтерілмек. Инвестициялық бағыт бойынша 250 астам қонақтар келу жоспарлануда. Олардың басым көпшілігі жеке инвесторлар, халықаралық трансұлттық компаниялардың өкілдері, инвестициялық қаржы институттары мен банк басшылары. Іс-шараның шетелдік қатысушыларының басым бөлігі Европалық Одақ компаниялары құрайды.

Туризм – Түркістан облысының дамуында және инвестиция тартуда ең басты және маңызды бағыттардың бірі. Қаржының ауқымды көлемі осы перспективалы салаға бағытталатын болады. Мысалы, статистикалық ақпараттарға сүйенетін болсақ, 2017 жылы Түркістан қаласына келген туристтер саны 1,2 млн. адамды құраған. Ал, 2018 жылдың бірінші жартыжылдығында келушілер саны 700 мыңнан асып, өткен жылмен салыстырғанда 60 пайызға көбейген.

Жуырда Елбасы Н. Назарбаев Қырғызстанда өткен түркітілдес мемлекеттері Кеңесінің Саммитінде атап өткен инициативалар қатарында Түркі кеңесінің мүше елдерін жаңа облыс орталығы – Түркістан қаласы құрылысының қатысуына шақырды. Бұл қалада ауқымды құрылыс жұмыстары жоспарланған. Осы орайда Түркістан ежелгі рухы сақталған, цифрландыру жүйесінің элементі бар, заманауи «ақылды қалаға» айналады. Сондықтан да Форум қазіргі таңның өзінде шараға қатысушы-инвесторлар арасында үлкен қызығушылық тудырып отырған құрылыс саласындағы жобаларды жүзеге асыруға бағыттайтын тиімді алаң болмақ.

Жансая ЕЛЕМЕСОВА