Елбасы Түркістанды түлетуге басты назар аударып, оған мемлекет қазынасындағы қаражаттан бөлек, кәсіпкерлер мен бизнес өкілдерін ат салысуға шақырған болатын.
Осыған орай облыс әкімі Жансейіт Түймебаев облыстық, аудандық мәслихаттың депутаттарымен және іскер азаматтармен кездесіп, Түркістан қаласын дамыту бойынша әзірленген жобалармен таныстырды.
Келешекте еліміздің ғана емес, күллі түркі жұртының мәдени орталығына айналатын шахарды көркейту күн тәртібіндегі басты мәселе. Бүгінде рухани астананы дамыту бағытында арнайы көркем фильм дайындалған. Онда Түркістанның ескі келбетін сақтай отырып жаңа бағытта бой көтеретін нысандардың келбеті бейнеленген. Арнайы жобаны іскер азаматтарға таныстырған облыс әкімі Жансейіт Түймебаев жаңа иядеяларды жүзеге асыру бағытында бірлікпен жұмыс атқаруға шақырды.
Өз кезегінде өңірдегі кәсіпкерлер палатасының директоры Асқар Абубакиров шағын және орта бизнесті дамытуда әкімдік тарапынан қолдаудың қажеттігін жеткізді. Мемлекет тарапынан берілетін несиенің санын арттырып , бизнес өкілдерінің қызығушылығын ояту Түркістанды түлетуге септігін тигізеді –деді палата басшысы.
Дегенмен, жаңа қарқынмен жұмыс бастауға ниет білдірген өңір азаматтары жетерлік. Халық қалаулылары атынан сөз алған облыстық мәслихаттың хатшысы Қайрат Балабиев Мемлекет басшысының 26-жыл бойы кәсіпкерлерге қолдау көрсетіліп келгендігін, енді кәсіпкерлер мемлекеттен алуды емес, қайта елге қызмет етіп, қолдау көрсетуі керек екендігін тілге тиек етті.
Жиында белгілі болғандай, жаңа облыс орталығы — Түркістанда белгілі кәсіпкер, облыстық мәслихат депутаты Серікжан Сейітжанов «Rixos» бес жұлдызды қонақ үйі сияқты мейманхана салуды бастап кетсе, түріктің іскер азаматы да бес жұлдызды екінші қонақ үйді тұрғызудың жобасын түзіп қойған. Ал облыстық мәслихаттың хатшысы, кәсіпкер Қайрат Балабиев спорт фитнес орталығын салуды ұйғарып қойған. Мұнан бөлек, бірқатар іскер азаматтар өзге де әлеуметтік, мәдени нысандарды салуға ниеттеніп отыр.
Алдағы күндері Түркістанда жаңа әуежай, темір жол вокзалы мен автовокзал, сервистік қызмет көрсететін әлеуметтік мәдени нысандар салып, оларға қажетті инженерлік инфрақұрылымды жүргізу жоспарлануда. Атап айтқанда ,жаңа әкімшілік ғимараты, басқармалара мен департаменттер үйі, драма театры, конгресс-холл, филармония, кітапхана, мәдениет сарайы, 500 орындық мешіт, спорт кешені, стадион, жүзу бассейні, Назарбаев зияткерлік мектебі, саябақтар, көпқабатты тұрғын үйлер, мектептер, бала-бақшалар, көрме орталығы, мұражай, опера және балет театры, ассамблея ғимараты, денсаулық сақтау нысандары және т.б. әлеуметтік-мәдени нысандар құрылыстары мен оларға қажетті инфрақұрылымдар жүргізу басты назарда.
Жомарт БЕГІМБЕТ
