Сарыағаш ауданында 585 пәтерлі 13 тұрғын үй салынып жатыр. Бұл 45 жылда болмаған жағдай. Облыс әкімі Ж.Түймебаевтың тікелей тапсырмасымен енді аймақтың халқы жаңа баспаналарға қол жеткізбек. Сондай-ақ, туризмі дамыған өңірде тағы 9 шипажай ашылатын болады. Емдік-сауықтыру орталықтарына келушілер қатары да өткен жылмен салыстырғанда 21 пайызға артқан.
Жұмыс сапарымен облыс әкімі Жансейіт Түймебаев әуелі Көктерек кентіндегі «Асем-Ай» минералды сусын өндіретін кәсіпорында болды. Жалпы аумағы 8 гектарды құрайтын зауыт сағатына 20 мың дана өнім өндіреді. Мұнда 80-ге жуық адам жұмыспен қамтылған.
Негізі Сарыағаш өңірі шипалы судың мекені. Бүгінде емдік суын іздеп келетін туристер саны да артып келеді. Жыл басынан бастап аймаққа аялдаған қонақтардың саны 34 мыңнан асқан. Ауданда жалпы саны 20 қонақ үй , 1 балалар шипажайы және 26 емдік-сауықтыру орталығы бар. Алдағы 5 жылда тағы 9 шипажай салу жоспарланған. Сарыағаштың туристік әлеуетімен танысқан аймақ басшысы Жансейіт Түймебаев шипажай салу мәселесінде әуелі демалушыларға қажетті жағдай жасауды тапсырды.
Сарыағаш өңірінде 45 жыл бойы көпқабатты тұрғын үйлер бой көтермеген. Биыл аймақтың тұрғындары үшін қуанышты жаңалық орын алып отыр. Сарыағаш қаласында 5 қабаттан тұратын 45 пәтерлі 13 тұрғын үй салынуда.
Аталған тұрғын үйлер тікелей Облыс әкімінің тапсырмасымен қолға алынған. Нысанға қаралған қаржының көлемі 394 млн 829 мың теңгені құрайды. Халыққа баспаналарды үлестіріп беру 2019 жылға жоспарланған.Тұрғын үйлердің алғашқы құрылысымен танысқан аймақ басшысы Ж.Түймебаев алдағы күндері аталған жұмыстарды бақылауға алатынын жеткізді.
By Айғақ медиа
