Қырым Республикасында жүрген Оңтүстікқазақстандық делегация Қара теңіз жағалауындағы Ялтадан 17 шақырым қашықтықта орналасқан Алупкада болды. Алупка тек әсем табиғатымен ғана емес, өз өмірін аспанмен байланыстырған әйгілі ұшқыш Амет-хан Султанның туған жері.
Екі рет Кеңес Одағының Батыры атағын алған Амет-хан Султан 603 рет әуеге көтеріліп, фашистің жүздеген ұшағын жарған. Екінші дүниежүзілік соғыс кезінде оның есімі бүкіл Кеңес Одағына дүркіреп тұрды. Алайда, бейбіт күні батырдың бейнесі біраз уақыт тасада қалды. Дегенмен, ұшқышты жерлестері дәріптеп, атынан мұражай ашты.
Әуедегі жаужүрек ерлігімен аңызға айналған батырдың туған жерінде болған қоғамдық делегация Амет-хан Султан мұражайымен танысты. Сондай-ақ, Қазақстаннан келген қонақтарға батырдың өмірінен сыр шертетін деректі фильмнен үзінді көрсетті.
Амет-хан Султан екі рет Кеңес Одағының Батыры атағын алды. Біздің мақтанышымыз Талғат Бигелдинов те дәл осы ержүрек ұшқыш секілді екі рет Кеңес Одағының Батыры атанған болатын. Қос бірдей тұлға да діні мен ділі ортақ түркі халықтарының аяулы перзенттері.
Бағлан БАЙКӨБЕКҚЫЗЫ,
Қырым Республикасы.
