Кемерово облысының бұрынғы губернаторы, 73 жастағы Аман Төлеев Кемерово облысының халық депутаттары кеңесінің мандатын алды, деп хабарлайды Тoday.kz.
«Бүгін Кемерово облысының сайлау комиссиясының отырысы өтті. Халық депутаттары кеңесінің бос мандатына бірыңғай тізімнен кандидатура беру туралы мәселе болды. «Единая Россия» партиясының Кемерово аймақтық филиалы Төлеев Амангелді Молдағазыұлына бос депутаттық мандатты беру туралы шешім қабылдады», — деді сайлау комиссиясының өкілі.
Комиссия өкілі, Төлеев 2013 жылы облыстық кеңес депутаттарын сайлау үшін «Единая Россия» партиясы ұсынған бірыңғай кандидаттар тізімін басқарғанын атап өтті.
Оның айтуынша, Төлеевке 2016 жылы отставкаға кеткен депутат Ван Вай-Ченнің бос мандаты берілді. Енді облыстық кеңес Төлеевке депутат куәлігін беріп, комитеттердің біріне кіруге тиіс.
1997 жылдан бері Кемерово облысының басшысы болған Аман Төлеев 2018 жылдың 1 сәуірінде Ресей Федерациясының Президенті Владимир Путинге Кемероводағы «Қысқы шие» сауда орталығындағы ірі өрттен кейін отставкаға кету туралы өтініш білдірді.
Естеріңізге сала кетсек қайғылы жағдайдан 64 адам қаза болып, 79 адам жарақат алды.
Путин Төлеевтің отставкаға кетуін қабылдап, облыс басшысының міндетін атқарушы 57 жастағы Сергей Цивилевті қызметке тағайындайды.