Биыл Қазақстандағы Өзбекстан жылы өтетіндігі туралы былтыр Өзбекстан Республикасының президенті Шавкат Мирзиеевпен шағын және кеңейтілген құрамдағы келіссөздерден кейінгі бірлескен мәлімдеме жасау барысында Мемлекет басшысы Нұрсұлтан Назарбаев айтқан болатын. Елбасы өз сөзінде «Достық қарым-қатынастың маңызды факторы біздердің үзіліп қалған мәдени-гуманитарлық байланыстарымыз екендігімен келісемін. Біз 2018 жылы Қазақстандағы Өзбекстан жылын өткізуге уағдаластық. Күн тәртібінде Өзбекстандағы Қазақстан жылын өткізу де бар. Аталған шара аясында түрлі іс-шаралар өткізілген болады. Олар бауырлас халықтарды одан әрі жақындастыра түседі», — деп мәлімдеді. Ал ағымдағы жылдың 15 науырызы күні Астанада Қазақстандағы Өзбекстан жылының ресми ашылу рәсімі өтті.
Оңтүстік Қазақстан Өзбекстан Республикасымен іргелес жатқан облыстардың бірі болғандықтан бүгінде көрші елмен қарым-қатынасты арттыру мақсатында ең әуелі көлік мәселесі қолға алынған болатын. Яғни, екі ел арасында халықтың емін-еркін қарым-қатынасын жақсарту мақсатында автобустар қатынады.
Ал өткен аптада Қазақстандағы Өзбекстан жылына арналған халықаралық велошеру өтті. Ташкент-Шымкент велошеруінің қатысушылары Қазақстанның Өзбекстандағы елшілігі ғимаратынан бастау алып, 130 км қашықтықты велосипедпен жүріп өтіп, Оңтүстік Қазақстан облысы әкімдігі ғимаратының алдында өз мәресіне жеткен еді.
Ал бүгін бір топ делегация мен «Айғақ» телеаранасының түсірілім тобы Өзбекстан Республикасының астанасы Ташкент қаласына барды. Онда ең алдымен қылқалам шебері, кескіндемеші, КСРО халық суретшісі, КСРО Көркемсурет академиясының толық мүшесі Орал Таңсықбаевтың Ташкенттегі музей-үйінде болды.
Мұражайдың бірінші қабатындағы үлкен бөлмеге біраз картиналар жылнамалық рет бойынша ілініпті. Ол жерден суретшінің 1935 жылдан бастап, 1973 жылға дейінгі аралықта жазған туындыларынан іріктеліп алынған картиналарын көруге болады. Сондай-ақ, бұл бөлмеге оның мольберті, үстелі, әлемдегі әртүрлі елдердің мұражайларына өтіп кеткен әйгілі туындыларының репродукциялары, мемлекеттік наградалары мен басқа да құжаттары қойылған.
Облыстық мәслихаттың депутаты Дулат Әбіш бастаған делегация құрамында, Ұлытау музейінің меңгерушісі Баян Шайгозиева, Қазақстан Журналистер одағының мүшесі, «Қазығұрт тынысы» газетінің бас редакторы Райымбек Айтубай және тағы басқалар бар.
Мұнан соң делегация мүшелері Uz Secure Expo 2018 халықаралық көрмесін аралап, түсірілім жасауды жоспарлап отыр.
