8 наурыз — Халықаралық əйелдер мерекесіне орай жуырда Қарағанды облысының əкімдігінде облыс əкімі Е.Қошановтың салтанатты қабылдауы өтті. Аймақ басшысы салтанатты қабылдауда нәзікжандыларға өзінің ақжарма тілегін арнады.
Халықаралық әйелдер күні қарсаңында Қарағанды облысының әкімі Ерлан Қошановтың салтанатты қабылдауы өтті. Шараға білім беру, денсаулық сақтау, мәдениет салаларының, мемлекеттік қызмет ардагер әйелдері, өнеркәсіп және ауылшаруашылық секторларының өкілдері, қорғаныс күш құрылымдарының қызметкерлері, спортшылар мен кәсіпкерлер шақырылды.
Аймақ басшысы кездесуге қатысушыларды және облыстың барлық әйелдер қауымын келе жатқан мерекемен құттықтап, оларға бақыт пен зор денсаулық тіледі.
— Бүгін зал жылылық пен сұлулыққа толы, — деді Ерлан Қошанов құттықтау сөзінде. – Мен сіздерді және облысымыздың барлық әйелдерін келе жатқан мерекемен құттықтағым келіп отыр. Нәзік жандылар іске кіріскенде барлық жұмысына жанын салады, сондықтан ол істің барлығы сәтті болары анық.
Аймақ басшысы көпбалалы аналарға «Алтын алқа» және «Күміс алқа» мемлекеттік марапаттарын табыс етті.
«Алтын алқа» иелері Алена Николаевна Асанбаева, Нұрсәуле Нұрқайдарқызы Нұртазина және Надежда Викторовна Хицко атанды. «Күміс алқа» Эльмира Рустембекқызы Түлееваға және Назгүл Шолпанқұлқызы Сарсенбаеваға табыс етілді.
Осы салтанатты қабылдауға Ұлытау ауданының Əйелдердің саяси көшбасшы мектебінен, Ұлытау ауданының Іскер əйелдер қауымдастығының мүшесі, ауданның қоғамдық мəдени іс-шараларына белсенді араласып, ел-жер тарихын, дəстүрлі іс-шараларды кеңінен насихаттап жүрген «Ұлытау» ұлттық тарихи-мəдени жəне табиғи қорық мұражайының этнография бөлімінің меңгерушісі Раймова Нұрсұлу Балтабайқызы қатысып, өңірден келген қыз-келіншектерді атаулы мерекемен құттықтап, сөз сөйледі.
— Барлық әйелдерді мейраммен құттықтаймын. Мен бүгін облысымыздың дамуына үлесін қосып жүрген жандардың арасында болу үлкен мәртебе. Ерлан Жақанұлы, сізге үлкен алғысымды білдіргім келеді, — деп алғысын айтты Нұрсұлу Балтабайқызы.
Жиынға келген барлық нәзік жандарға естелік сыйлықтар табыс етілді.
