Қадірлі халайық!
Күллі Шығыс халқына етене жақын һәм ортақ, тек адамзат қана емес, табиғаттың да жасарып, бой түзейтін шағы-Ұлыстың ұлы күнінің еліміз үшін жолы да жөні де бөлек.
Иә, «Туған ай тураған етпен тең» демекші әне-міне дегенше қар еріп, жылғалардан су ағып, табиғат жасарып, көктемнің саумал самалына ілесіп Наурыз мейрамы да жетті.
Күн мен түн теңелген, Жер шуаққа кенелген,-дейтініміз де содан.
Ал, сондай, баға жетпес Әз — Наурызымыздың: «Қазығұрттың басында кеме қалған, Ол, әулие болмаса неге қалған?» деп ежелгі жырда айтылатынындай киелі де қасиетті Қазығұрт жерінде тойбасы болып басталып жатқаны тегін емес…
Келе сала Наурызым жоқ нәрсені бар қылар,- дегендей ақпейіл халқымыз өзінің ең сүйікті де көне, байырғы мейрамынан әрқашан тек жақсылық күткен. Ол сенімі осы жолы да алдамады…
Елі сенген әрі сүйген-Тұңғыш Президентіміз Н.Ә.Назарбаевтың біртұтас халқының әл-ауқатын бұрын-соңды болмаған дәрежеде көтеруге сеп болатын, еңсесін тіктейтін, «басқалармен қатар тұрғызатын» «Президенттің бес бастамасының» да 5-ші Наурызда жолдануы осы қасиетті мерекенің заманауи түрленген жоралғысы деп білеміз. Қуаныш қуанышқа ұласты деген осы болса керек.
Қадірлі жерлестер!
Баршаңызды халқымыздың ең ұлы да береке басы мейрамы, ақ ниет пен қуаныштың ақ қанат қарлығашы – Әз Наурыз мейрамымен шын жүректен құттықтаймын. Еліміз аман, жұртымыз тыныш болсын!