ҮНДЕУ
Оңтүстіктің белсенді жастары мен жастар ұйымдары Шығыс Қазақстан облысында су тасқыны орын алуына байланысты бей-жай қарай алмай, облыс тұрғындарына ҮНДЕУ жариялайды.
Құрметті оңтүстікқазақстандықтар!
Отандастарымыздың қайғысы мен басына түскен қиындығы бүкіл Қазақстан халқының қабырғасын қайыстырды. «Апат айтып келмейді» дейді дана халқымыз. Мұндай жағдай кез келген елде, кез келген өңірде орын алуы мүмкін. Қиын жағдайға тап болған жандарға қол ұшын созу — адамгершіліктің ғажап үлгісі, ұлттық дәстүріміз арқылы біздің сүйегімізге сіңген қасиет. Ежелден қарға тамырлы қазаққа жау да, дау да, той да, қайғы мен қаза да ортақ. Көмекке мұқтаж бауырларымызға көмек беру — баршамыздың азаматтық парызымыз.
Сондықтан, қолымыздан келгенше қиын сәтте облысымыздың барша тұрғындары мен жастарын, беделді кәсіпкерлерін, үкіметтік емес ұйымдарды, мемлекеттік және бюджеттік мекемелерді сол аймақтардағы жерлестерімізге көмек көрсету мақсатында материалдық және моральды көмек қолын созуға шақырамыз!
Құрметті Оңтүстік Қазақстан облысының тұрғындары!
Баршаңызды табиғи апаттан зардап шеккендерге көмек беру мақсатында көмек қолын созамын деушілерге облыстық «Жастар ресурстық орталығы» КММ-нің (Шымкент қаласы, Түркістан көшесі, №1 үй) есігі ашық!
Қаржылай көмек берем деушілер үшін арнайы «Бізбен бірге» қоғамдық қорының есеп шоты ашылған.
БИН: 150540004179
ИИК: KZ 42 84 906 KZ 000966548
БИК: NURSKZKX
Код: 18
Тел: 8707-404-02-11,
8775-404-04-21