Оңтүстік Қазақстан облысының әкімдігінің сайтында жарияланған облыс әкімі Ж.Түймебаевтың 2016 жылы атқарылған жұмыстары жөніндегі облыс халқы алдындағы есебінен «Индустрия және кәсіпкерлік» мәселесі бойынша үзіндіні сіздердің назарларыңызға ұсынамыз.
Елбасы 2017 жылғы Қазақстан халқына арналған Жолдауында жаңа индустриялар құрумен қатар, дәстүрлі өнеркәсіптің басым салаларына ерекше көңіл бөлді. Мұнда бәсекеге қабілетті экспортқа бағытталған өндірістерді дамыту міндеттеріне баса назар аударылды.
Осы бағыттағы жұмысты жандандыру мақсатында және облыстың Индустриаландыру картасы аясында 2017-2020 жылдары жалпы 91 жоба, оның ішінде үстіміздегі жылда 20 жобаны жүргізуді жоспарлап отырмыз. Атап айтқанда:
Инвестиция көлемі 580 млрд. теңгені құрайтын «Петро Қазақстан Ойл Продактс» мұнай өңдеу зауытын жаңғырту және 5,5 млрд теңге инвестиция тартылатын «HILL Corporation» ЖШС-нің пайдаланған майларды регенерациялау көзделіп отыр.
20 млрд теңгеге «Шымкент цемент» зауытын жаңғырту, 3,5 млрд теңгеге «Azala Fabric» ЖШС-нің дайын тоқыма бұйымдары өндірісін кеңейту күтілуде. (2018 жылы).
«Шымкент химия компаниясы» этил трет-бутилді эфирінің және полипропилен өндірісі (Инвестиция көлемі 19,8 млрд.теңге, іске асыру мерзімі 2019 ж.); «Standart Petroleum & Co» мұнай өңдеу зауыты салынатын болады. (Инвестиция көлемі 21,8 млрд.теңге, іске асыру мерзімі 2020 ж.)
2020 жылы өнеркәсіп өнімінің көлемін 1,1 трлн. теңгеге жеткізіп, орташа есеппен жыл сайын нақты көлем индексінің өсімі 2-3 % деңгейінде жоспарлануда. Жалпы облыс экономикасына 1 трлн. теңгеден астам инвестиция тартылады.
Кәсіпкерлікті қолдау мақсатында бұрынғыға қарағанда ұсынылатын шағын несие көлемі 18 млн. теңгеге дейін жеткізілді. Бұл несиенің берілу мерзімі Шымкент, Түркістан, Кентау қалаларына 5 жыл, ал қалған шағын қалалар мен елді мекендерге 7жыл. Жылдық пайыздық мөлшерлемесі 6 %-ды құрайды.
Мемлекеттің тарапынан жаңадан кәсібін бастайтындар үшін несиенің 85%-на, әрекеттегілерге 50%-на дейін кепілдендіріледі.
2017 жылы бұл бағытқа жалпы 3,1 млрд. теңге қарастырылып, 400-ге жуық жобалар қаржыландыру, мыңнан астам жұмыс орны құру жоспарлануда.
Осы мүмкіндікті пайдалану үшін ісін жаңадан бастайтын кәсіпкерлер мен шаруашылығын кеңейтуді көздейтіндерді аталған бағдарламаға қатысуға шақырамын.
Сонымен бірге «Даму» Қоры арқылы кәсіпкерлер үшін ұтымды бастаманы бастадық. Енді екінші деңгейдегі банктер арқылы қазынадан 1 млрд.теңге бюджеттік кредит бағытталып отыр. Яғни өңдеу өнеркәсібіндегі кәсіпкерлерге 8,5 %-бен несие берілетін болады. (Нарықта 19%)
