Осыдан тура бір жыл бұрын, ақпанның ақ боранында Қайрат Исламқұловтың жүрегінің дүрсілі тоқтаған болатын. Арада уақыт зымырап, тіршіліктің бойында қан жүріп тұр. Бірақ ортамызда ғұмырын ғылымға арнаған абзал азамат жоқ. ҚР Президенті Н.Назарбаевпен бірге Украйнада білім алып, Мәскеу қаласында мықты білімімен талайды мойындатқан марғасқаның есімі ұлықталар күн туды. Сенбі күні М.Әуезов атындағы ОҚМУ «Б» корпусына шәкірттері, әріптестері мен туған-туыстары жиылып, профессор әрі ғалым туралы толғаулар айтып, елеулі еңбегін мадақтады.
Ғылым саласында көшбасшылық қасиетімен ерекшеленген Исламқұлов тектінің жалғасы екенін әркез ісімен дәлелдеген ер. Әкесі Мұхаметқұл Исламқұлов екінші дүниежүзілік соғысқа қатысып, даңқты жолда жан тапсырған. Сол жауынгердің жалғыз тұяғы 200-дей ғылыми мақала жазып басы бейнет, соңы зейнет болған білімге ерекше үлес қосты. Шәкірттері мақтанарлық осындай ұстаздың беделі көтеріліп, есімі ел есінде қаларлықтай жағымды жаңалық жарқ етті. М.Әуезов атындағы университеттің Б корпусында ескерткіш тақтайша ашылып, 77 жыл өмір сүрген тау тұлға талайдың есінде үлгі болып қаларлық игі іс-шараға көпшілік куә болды.
Қайрат Исламқұловтың өмірбаянына көз салсаңыз бағындырған белестері аз емес. Есіміне байланысты қажыр-қайраты да мықты болған. Сондықтан жоғарғы оқу ордасы кейінгі буынға үлгі ретінде бір корпусқа есімін беріп, еңбек еткен лабораторияда даңқтарын жазып қойды. Дәл осы шараның соңы жылдық асқа ұласты. Қайрат Мұхаметқұлұлының көзін көрген талайлар жиылған аста мәнді әнгімелер айтылып, рухына құран бағышталды.
«Білімді өлсе, қағазда аты қалар. Ұста өлсе, істеген заты қалар» деген мақалды дәл осы Қайрат Исламқұлов секілді ғибратты өмір сүргендерге айтылған дерсіз. Жаны мен қолының тазалығы әрептестерінің арасында аңыз болып, инемен құдық қазған еңбегі туралы бұл күні естеліктер көп айтылды. Жақсының есімі осылай жұрттың жадында сақталса, ғалымның қалдырған хаты ұрпақтың қолында қалып отыр.
Бағлан БАЙКӨБЕКҚЫЗЫ
