Өңір жастары енді Туркия елінің үздік қонақ үйлерінде тегін тағылымдама бағдарламасынан өту мүмкіндігіне ие болып отыр. Ал бұл жобаны ОҚО кәсіпкерлер палатасы «Business TravelCentralAsia» туристік компаниясымен бірлесіп жүзеге асыруда. Аталмыш бағдарламаға 18-45 жас аралығындағы кез-келген саладағы мамандар қатыса алады. Алты ай мерзімге созылатын бұл жоба жастар үшін тәжірибе алмасып, тіл үйренуге мүмкіндік туғызып қана қоймай еліміздегі туризм саласын дамытуға да өз септігін тигізетін болады.
Ол үшін бағдарлама қатысушыларына барлық жағдайлар қарастырылған. Яғни ақысыз екі бағытта ұшумен қатар күніне 3 мезгіл тамақтану, медициналық сақтандыру және айына 125 мың тенгеден бастап жалақы төленеді. Сондай-ақ түрік тілін тегін үйрену мүмкіндіктері жасалынады. Осылай деген бағдарлама ұйымдастырушыларының айтуынша бұл жобаға қатысамын деушілерге қойылатын негізгі талаптың бірі үміткер ағылшын немесе түрік тілін білуі тиіс.
Туркия елі мәдениет пен туристік орталық екендігі белгілі. Сондықтан Оңтүстік жастары үшін ұсынылған бұл жоба – шет елдерде жүріп, алған білімдері мен дағдыларын іс-жүзінде пайдаланып, туризм саласында табысты қызметке қажетті тәжірибе жинақтауға жол ашады. Осы орайда жоба ұйымдастырушылары 23 қаңтардан бастап өңірдегі бірқатар жоғары оқу орындарының студенттеріне бағдарлама барысын түсіндірсе 26 қаңтарға дейін үміткерлерден өтініштер қабылданған. Сонымен Туркия елінде 6 айлық тәжірибелік тағылымдамадан өту бағдарламасын түсіндіру жұмыстарына 300 ден астам студент жастар қатысса, бұған қызығушылық танытқан 50 азаматтан өтініштер мен құжаттар қабылданып үлгерген.
