Шымкент қаласындағы № 24 мектеп-лицейде өтіп жатқан Еңбекші ауданының әкімі Ғалымжан Илясовтың халық алдындағы есеп беру кездесуіне ОҚО әкімі Жансейіт Түймебаев кенеттен кіріп келді. Облыстың бірінші басшысын келеді деп күтпеген Еңбекшінің әкімі де, қала мэрі Сауранбаевта бір сәт таң қалып қалды.
Ал, залдағы тұрғындар күтпеген жерден келген әкімнің іс-әрекетіне риза болып, қол шапалақтады. Халықпен амандасып, мінберге шыққан Жансейіт Қансейітұлы: «Күтпеген боларсыздар, мен енді әкім есептеріне осылай айтпай кіріп келемін. Білейік,олар халыққа не айтып жатқандарын», деді.
Осыдан соң орнына жайғасқан бірінші басшы Ғалымжан Молдабайұлына жиынды әрі қарай жалғастыра беруге рұқсат берді. Бұл уақытта Еңбекшінің әкімі жылдық жұмысының баяндамасын аяқтап, залдағы көрермендердің сауалына жауап беріп жатқан болатын. Темірді қызған кезде соқ дегендей, бұған дейін аудан әкіміне мәселелерін айтып жатқан тұрғындар, облыс әкімінің қатысқанын пайдаланып, тікелей Түймебаевқа жолдады.
Негізгі сауалдар: жол, кәріз жүйлері мен аулалардағы ойын алаңшаларына қатысты. Барлығынан хабардармын,бюджетке ұсыныс бергенмін деген аудан басшысының сөзін Жансейіт Түймебаевта толықтырды. «Барлық мәселелеріңіз уақытысымен шешіледі. Кезінде тап осы көпқабатты үйлерде жарық, газ болмай, далаға ошаққа тамақ пісірген кездер де болған. Бюджет шексіз емес қой. Кішкене сабырлық танытайық» деді.
Сондай-ақ, Түймебаев әкім есебі өткен мектеп оқушыларымен кездесті. Естеріңізге сала кетейік, Еңбекші ауданының әкімі Ғалымжан Илясовтың бұл 2017 жылдағы жұмыстары бойынша қорытынды есебі болатын.
Гүлжан НҰРЛАНҚЫЗЫ