«Нұр Отан» партиясы облыстық филиалының қабылдау бөлмесінде облыс тұрғындарын қабылдау жұмысы жүргізілді. Шараның мақсаты – өңірдегі қордаланған мәселелердің түйінін тарқатып, халыққа мейлінше қолайлы жағдай жасау. 5 басқарманың басшысы қатысқан қоғамдық қабылдауда әр салалар бойынша шешімін таппай жүрген түйіткілді мәселелер тыңдалды.
Облыс көлемінде бүгінгі күнде 16 қоғамдық қабылдау бөлмелері қызмет жасайды. Олардың барлығы да компьютерлік техникамен жабдықталып, орталықтандырылған онлайн режиміндегі бейне-камералармен толыққанды халыққа қызмет көрсетілуде. Бірақ та азаматтардың арыз-өтініштері бойынша өткізілетін ашық қабылдаулардың ауқымы тар. Сол олқылықтың орнын толтыру мақсатында, аймақ басшысы Жансейіт Қансейітұлы тікелей тапсырма берді. Яғни, әр апта сайын «Нұр Отан» партиясы облыстық филиалының қабылдау бөлмесінде қоғамдық қабылдаулар өткізіп отыру қолға алынды. Бүгін жоғарыда аталып өтілген бастама бойынша кезекті халықты қабылдау күні өткізілді. Қоғамдық қабылдауға бес басқарма басшылары қатысты. Атап өтетін болсақ: Облыстық Білім, Ішкі саясат, Дін істері, Мәдениет және тілдерді дамыту және Ақпараттандыру, мемлекеттік қызмет көрсету және архивтер басқарма басшылары қатысты.
Алдағы уақытта бұл игі бастама жалғасын табатын болады. Яғни, қаңтар айының 25, ақпан айының 1-8 күндері сағат 11.00 мен 13.00 аралығында «Нұр Отан» партиясы облыстық филиалының қабылдау бөлмесінде қоғамдық қабылдау өз жалғасын табатын болады. Әр салаға қатысты шешімін таппай жүрген қандай да бір мәселеңіз болса, тиісті басшылар сіздерді тыңдауға дайын.
Жансая Елемесова
