Бауыржан Қалжанов есепті кездесуін өткізді

Осыменен бесінші жыл халық алдында есепті кездесуін өткізіп жатқан Бауыржан Қалжанов тауық жылы толағай табыстар мен ілкімді істерге толы болғандығын баяндады. Айтуынша, аудандағы он екі көпқабатты тұрғын үйлердің ауласына ойын алаңшалары орнатылып, 183 көпқабатты үйдің ауласы абаттандырылған. 16 көшеге орташа жөндеу жұмыстары жүргізіліпті. Ал Сәуле шағын ауданындағы Абай, Ғани Мұратбаев, Баянауыл  өткеліне күрделі жөндеу жұмыстары жүргізілген. Білім саласында да серіпін бар. 2017 жылы ауданға қарасты Жаңаталап аумағында 600 орындық мектеп құрылысы аяқталып, пайдалануға берілген. Қызылжар шағынауданындағы 900 орындық білім ошағының құрылысы өткен жылдың тамызынан бастап жүргізілуде екен. Игілікті іс инфрақұрылым саласында да баршылық.

Аудан  аумағы 14 380 гектарды құрайды. Территориясында 200 мыңнан аса халық тұратын Әл-Фарабиде кешегі күнге дейін ретсіз сауда өзекті мәселе болып келгендігі жасырын емес. Бүгінгі таңда  жабайы сауданың сіркесі су көтертпей, ретсіз сауданы біршама реттеуге әкімдіктің үлесі мол. 661 тұлғаға әкімшілік хаттама рәсімделіп, 300 мың теңгеге жуық  айыппұл салынған. Кәсібін дөңгелетемін деп ниет білдірген  азаматтардың 27 жобасы мақұлданып, мемлекеттік бағдарлама аясында қомақты қаржы да бөлінген. Ал қарапайым халық тұтынатын ең бірінші азық-түлік бағасы әкімдіктің әрқашан жіті назарымен қадағалауында екен. Яғни, аудан аумағындағы 33 нысан монитрингке алынып, арнайы меморандум да жасалған. Бауыржан Ахметәліұлының басшылығымен әкімдіктің атқарған жұмысына жергілікті тұрғындардың көңілі толады. Жас келсе іске деген, алдыңғы толқын әкімнің алдағы жұмысына да сәттілік тіледі.

 Тұрғындар жарамсыз жолдардың мәселесін де  айтып қалды. Жауапты басшылар, барлығы кезең-кезеңімен іске асады деп  уәде етті. Бұған иланған бұқара халық  қоғамдық көліктің мәселесіне келгенде  көкейдегі мен күндегі көз көріп жүргеннің тізгінін тарқатты. Осылайша, бір жарым сағатқа созылған әкім есебінде ауыз толтырып айтарлық ауқымды іс те, әлі атқарылуы керек жұмыстарда пысықталды. Әдеттігедей сала құлаш баяндама мен кезекші қарттардың мақтауға толы жарыссөзінен  аулақтау форматта өткен бұл жиын,  өзге есепті жиыннан өзгерек. Осы қуантты.

Гүлжан НҰРЛАНҚЫЗЫ