«Жадымда жүрер жаңғырып». Дәл осы тақырыпта «Отырар» облыстық ғылыми-әмбебап кітапханасында ұлтының бағына туған асыл азамат Жақсыбек Бейсенбекұлын еске алу кеші өтті. Аталған шараның мақсаты ел ағасының өнегелі өмір жолдарын өскелең ұрпаққа үлгі ету болып табылады. Басқосуға Жақсыбек Асылбекпен қызметтес болған ел ағалары мен мәдениет, білім саласының ардагерлері қатысып, жүрек жарды лебіздерімен бөлісті.
Өзі өмірден өткенімен артында өшпестей із қалдырған азаматтарымыз аз болмаған. Әсіресе, шәкірт тәрбиелеумен қатар басшылық қызметтерде өңірдің дамуы үшін қажырлы еңбек еткен, қызметі барысында тек абырой биігінен көріне білген азаматтарды ел есінен шығармайды. Қасиетті Отырар топырағының рухы биік тұлғаларының бірі Жақсыбек Бейсенбекұлы Асылбек те осындай жандардың қатарынан еді. Қаншама ұлы тұлғалар мәңгілік мекен еткен жерде дүниеге келген Жақсыбек Бейсенбекұлы осы өңірдің дамуы үшін бар күш-қайратын жұмсап әрекет етті. Қызметін мектепте іс жүргізушіліктен бастаған ол мемлекеттік қызметте де жұмыс атқарды. Облыстық мәслихаттың депутаты бола жүріп ел игілігі үшін абыройлы еңбек етті. Сонымен қатар, түркістандық ұстаздарға басшылық жасап, өмірінің соңына дейін қалалық білім бөлімін басқарды. Ұлағатты ұстаз түркістандықтардың есінде қарапайымдылығымен, іскерлік қабілетімен, жоғары адамгершілік қабілеттерімен қалды. Отырар ауданы мен Түркістан қаласының ғана емес, Оңтүстік өңірі зиялыларының, құрметті азаматтарының қатарынан орын алды.
Осындай абзал жанды еске алу мақсатында ұйымдастырылған кеш қазақ сатирасының сардары Көпен Әмірбектің жүргізуімен өтті. Шара барысында ел ағасының көзін көрген жандардың басын қосып, естеліктермен бөлісті.
Елім деп соққан жүрегінің қалауын орындаған, адал тірлігінің арқасында өзінің өрнекті мектебін қалыптастырған, елінің құрметіне бөленген, халықтың қалаулысына айналған, қоғамдық өмірдегі толымды тұлғалық бейнесін қалыптастырған Жақсыбек Бейсенбекұлының өмір жолы жастарға үлгі-өнеге. Еліне аянбай еңбек еткен Жақсыбек Асылбектің жүріп өткен жолын таразылай қарағанда жүрек тыныштығы сезіледі. Өйткені, оның қалдырған ізі тарихтың үлкен белестерінде, халқының жүрегінде мәңгілік сайрап тұр.
Жансая Елемесова
