Елбасы жолдауын насихаттап аймақ тұрғындармен кездесіп жүрген ҚР Парламенті Сенатының депутаты Әли Бектаев Сайрам ауданында да болды. Болашағына бей-жәй қарамайтын әрбір қазақстандықты үн қосуға жетелейтін биылғы жолдау 10 негізгі міндеттен тұрады. Соның бірі «Ақылды технологиялар» яғни агроөнеркәсіп кешенін қарқынды дамытуға бағытталған. Осы талапқа сай жұмыс жасап отырған аудандағы заманауи жылыжай кешенін аралап көрген Әли Әбдікерімұлы сапар соңында жолдауды насихаттау мақсатында аудан активімен кездесті.
ҚР Парламенті сенатының депутаты, Әли Бектаев Сайрам ауданына жасаған сапары барысында Қарабұлақ ауылындағы «Баракат» шаруа қожалығы жылыжай кешенінің жұмысымен танысты. Жүз пайыз тамшылатып суару технологиясы бойынша іске асырылған жылыжайдың жалпы көлемі 2,4 гектарды құрайды. Жылына екі мәрте өнім алуға мүмкіндік беретін бұл кешенің әр гектарынан орта есеппен 400 тоннаға дейін өнім жиналады. Ал мұнда қазір 30 шақты азамат жұмыспен қамтылса, жылыжайда қызанақ қияр өнімдері өсіріледі. Бүгінде Туркиялық мамандармен бірлесіп сапалы әрі сұранысқа ие көкөніс өндіру ісін мықтап қолға алған шаруашылық қызанақтың голандиялық сортын өсіруде.
Жылыжайда пісіп жетілген сапалы қызанақ және қияр өнімдері қазіргі таңда жергілікті нарықпен қатар бірқатар облыстарға да шығарылып отыр. Осылай деген серіктестік өкілдеріне Сенат депутаты кәсіпкерлік және ауыл шаруашылық салаларына мемлекет тарапынан соңғы жылдары үлкен қолдау көрсетіліп отырғандығын жеткізді. Сонымен бірге Әли Әбдікерімұлы Елбасының биылғы жолдауында да жаңа технологияларды қолдана отырып агроөнеркәсіп кешенін қарқынды дамытуға басымдық берілетіндігін атап өтті.
Бұл күні Сенат депутаты Әли Бектаев Сайрам ауданы әкімдігінде де кездесу өткізіп Мемлекет басшысының биылғы жолдауында айтылған міндеттерге кеңінен тоқталып өтті. Ал жиынға ауылдық округ әкімдері, дербес бөлім басшылары депутаттар мен ардагерлер қатысты. Айта кетсек Президент өз жолдауында Қазақстанның түрлі сынақтарға төтеп беріп, қарқынды экономикалық даму жолына бет алғандығын айта келе ел алдындағы 10 негізгі міндетті атап көрсетті. Бұл тұрғыда Елбасы ең бірінші міндет индустрияландыру жаңа технологияларды енгізудің көшбасшысына айналуы тиіс деді. Яғни бұл кәсіпорындарымызды жаңғыртуға және цифрландыруға бағытталған. Жолдауда айтылған осы және өзге де міндеттердің маңыздылығы кеңінен сөз болды.
Сонымен бірге Жолдауда ресурстық әлеуетті одан әрі дамыту, көлік-логистика инфрақұрылымының тиімділігін арттыру сынды маңызды міндеттер жүктелген. Ал «Адами капитал — жаңғыру негізі» деген Елбасы барлық жастағы азаматтарды қамтитын білім беру ісінде өзіміздің озық жүйемізді құруды жеделдетуді ұсынды. Бұл тұрғыда Қазақстандықтардың қазақ, орыс және ағылшын тілдерін еркін меңгеруі де маңызды рөл атқарады. Жолдауда айтылған осы және өзге де маңызды міндеттерге жан-жақты тоқталған Әли Бектаев кездесу барысында қойылған сауалдарға да жауап беріп жатты.
Абай Омар
