«Жерде жетім жыласа, көкте періште күңіренеді» деген сөздің мағынасы терең. Бүгінде тағдырдың талқысымен жетімдер үйі мен бөбектер үйі жетерлік. Мемлекет тарапынан әлеуметтік жағынан қанша көмек көрсетілгенмен, ата-анасының аялы алақаны мен махаббатына зәру сәбилердің мұңды көзі жаныңды ауыртады. Бүгінде бүлдіршіндердің жанына жылу сыйлап жүрген азаматтардың қатары көп. Соның бірі Жұмазия Кішкентайқызы. Өзінің жомарт жүргімен ел анасы атанған аяулы жан балғындардың болашағы үшін қолдан келер көмекті аямай келеді. Еңбегін ескерген бөбектер үйінің тәрбиеленушілері Жаңа жылда Жұмазия апаға мерекелік көңіл күй сыйлауды мақсат тұтып ыстық лебіздерін жеткізді.
Бүгінде бөбектер үйінде 84 бала тәрбиеленуде. Барлығы да бір отбасындай тату-тәтті болып, жаңа жыл қарсаңында жүрегі дархан, жаны жомарт Жұмазия апасына арнап мерекелік кешін ұсынды. Бірі ән айтып, бірі би биледі.
Жұмазия Кішкентайқызы сонау 1980-ші жылдардың ортасында Оңтүстік өңірінде шоғырланған бес тігін фабрикасын басқарып, кейіннен «Қыз Жібек» деп аталатын жеке тігін мекемесін ашқан алғашқы кәсіпкер әйел десе де болады. Сол замандарда «Қыз Жібек» тіккен киімдерді қолы жеткендер мақтана киетін. Өйткені оның сапасы да, сәні де сол уақыттың талабына сай болатын.
Бүгінде «Қыз Жібек» ательесі жабылған. Әйтсе де қожайыны Жұмазия Кішкентайқызы тігін өнерінен қол үзген жоқ. Жетпістің алтауына жетсе де қол қусырып қарап отыра алмайтын ардагер тігінші бүгінде қайырымдылық істермен айналысып келеді. Соның бір дәлелі Шымкент қалалық мамандандырылған бөбектер үйіне жасаған қайырымдылық шаралары. Яғни, кіп-кішкентай балаларға арнап әртүрлі киім-кешектер тігіп, тоқыма тоқиды.
Шет елдік ЭКСПО көрмелерін талай рет көзімен көреген жанның қолымен жасалған арнайы киіз үйге көзіміз түсті. Айрықша сән үлгісінде жасалған ақүй әсем жіптермен өрнектеліп, бөбектер үйіне ерекше сән беріп тұр.
Негізі әр адам сауап тірлік жасауға асығуы керек. Неге десеңіз, жағдайы жақсы, өзгелерге көмектесуге шамасы келетін әрбір адам жетім-жесірлерге қол ұшын беріп тұрса, жұмысының берекесі кіреді, ісі ілгері басады. Расында да әрбір адам осы кісінің ісінен үлгі алса, айтқан кеңесін тыңдап, пайдалы әрі сауапты іспен шұғылданса нұр үстіне нұр болар еді.
Ал біз сөз соңында Жұмазия Кішкентайқызына мықты денсаулық тілейміз. Жүз жасаңыз, Жұмазия апа!
Жансая Елемесова