Ағымдағы жылдың 29 қарашасында Қазақстан Республикасы Тұңғыш Президенті – Елбасы кітапханасының Музейнде «Тіл жанашыры – 2017» республикалық байқауы өтті. 37 жеңімпаз анықталған байқауда «Саутс-Ойл» компаниясының бас директоры, Қазақстан Республикасының еңбек сіңірген қайраткері, облыстық мәслихаттың депутаты, елімізге белгілі меценат Серікжан Сейтжанов та марапат төрінен көрінді.
2007 жылы бастау алған игі шара «Тіл жанашыры» қоғамдық бірлестігімен бекітілген. Екі жылда бір ретөтіп тұартын қоғамның бұл жоғары марапаты жыл сайын мемлекеттік тілді дамыту мен насихаттауға елеулі үлес қосқан еліміздің, сондай-ақ шет мемлекеттердің азаматтарына табысталады. Атап айтқанда, ол қоғамдық негізде қазақ тілін БАҚ, әдебиет пен өнер саласында насихаттаушыларға, Қазақстанда және шетелде қазақ тілі білімінің деңгейін көтеру бойынша оқыту және мәдени-ағартушылық бағдарламаларын әзірлеушілер мен іске асырушыларға, инновациялық және бірегей авторлық оқыту әдістемесін қолданып, оқушылар мен студенттерге мемлекеттік тілді оқытушыларға, сонымен қатар тіл білімі, тарих, этнография салаларының өзекті мәселелеріне ғылыми зерттеу жүргізушілерге, қазақ тілі мен мәдениетін дамытуға бағытталған баспа өнімдерін дайындаушылар мен шығарушыларға, қоғам өмірінің әр саласында қазақ тілінің кең қолданылуына бағытталған мәдени-бұқаралық іс-шараларды ұйымдастырушыларға, қазақ тілі мен мәдениетін дамытуға ықпал ететін іс-шараларға демеушілік жасағандарға беріледі.
Салтанатты жиынды ашқан Президент Кеңсесінің бастығы, Тұңғыш Президент – Елбасы кітапханасы директорының міндетін атқарушы Махмұт Қасымбеков марапат тапсырылатын орынды әдеі таңдап алғандығын жеткізді. Яғни, Елбасымыздың Астанадағы резиденциясының күмбезді залын таңдап алу себебі, осыдан 20 жыл бұрын 1991 жылы 10 желтоқсанда нақ осы залда Парламент пен Үкіметттің бірлескен отырысы өткізіліп, Ақмола қаласы еліміздің жаңа астанасы болып салтанатты түрде жарияланған болатын. Сондай-ақ, Елбасымыз мемлекетіміздің тарихындағы аса маңызды өзге де көптеген шешімдеріне осы ғимаратта қол қойылған екен.
Махмұт Қасымбеков: «100-ден астам ұсыныстың ішінен осы құрметке 37 азамат нағыз лайық деп таңдап алынды. Сондықтан бүгін табыс етілетін «Тіл жанашыры» құрмет белгісін – сіздердің осы кезге дейін атқарған істеріңізге деген құрметіміз деп қабылдаңыздар», деді өз сөзінде.
«Тіл жанашыры» төсбелгісін кеудесіне таққан Саутс Ойл мұнай компаниясының президенті, көрнекті қоғам және мемлекет қайраткері, облыстық мәслихаттың депутаты, елімізге белгілі кәсіпкер, меценат Серікжан Сейтжановтың халыққа жасаған еңбегі ерен.
Ол өз қаражатына сырлы Созақ өңіріндегі бүкіл түркі әлеміне белгілі тұлға Баба Түкті Шашты Әзіз әулиенің бұзылғалы тұрған кесенесін қайтадан жаңғыртып туған жерді түлетуде перзенттік парызын өтеп жүрген жан.
Бірқатар қазақ ақын жазушылардың кітаптары мен өнер туындыларын жарыққа шығаруға септігін тигізген, өнер мен шығармашылықты жанындай сүйетін меценат.
Техника ғылымдарының докторы, профессор Серікжан Сейтжанов бүгінде 60-қа жуық ғылыми мақалалары мен 3 монографияның авторы.
Ұстазды қадірлеген жан 2011 жылы Шымкент қаласының қақ төрінен ғалым, профессор Сұлтан Сүлейменовке арнап алып ескерткіш орнатты.
Сондай-ақ, Қазақстан тәуелсіздік алған жылдарда кәсіпкерлікті дамытып ел экономикасының дамуына және халықты жұмыспен қамтуда зор үлес қосып халықтың алғысына бөленіп, Елбасының сенімін ақтап жүрген азамат.
Айта кетейік, алғашқы рет «Тіл жанашыры» құрмет белгісімен қазақ тілін зерттеген шетелдік ғалымдар марапатталған. Одан кейінгі жылдары марапатқа тілге шынайы қамқорлық пен жанашырлық танытқан, оның дамуына елеулі үлес қосқан ғалымдар, оқытушылар, ақын-жазушылар, мемлекеттік қызметшілер, қоғам қайраткерлері, журналистер және мемлекеттік тіл мен қазақ мәдениетін қолдау бойынша ұйымдастырылған іс-шараларға демеушілік жасаған меценаттар ұсынылған.
