Санкт-Петербургте жүрген ОҚО-ның делегациясы дүниежүзіндегі ең үлкен музейлердің бірі Эрмитажда болды. Эрмитаж –Ресейдегі және дүние жүзіндегі ең ірі көркемсурет және тарихи-мәдени мұражай. Санкт-Петербург қаласында 1764 ж. Екатерина ІІ-нің жеке қоры негізінде ұйымдастырылған. Мұнда әлем мәдениетінің 3 млн-ға жуық өнер туындылары мен құнды ескерткіш жәдігерлері қойылған.
Эрмитаждың «Алтын орда» экспозиция залында жарты әлемнің билеушісі болған Ақсақ Темірдің тасы қойылған.
200 мың әскерімен Тоқтамысқа жорыққа шығарда Ақсақ Темірдің Ұлытауға аялдап, Алтыншоқыдан (Ұлытаудың күнбатыс бөктерінде Жетіқыз өзенінің жағасы) табылған тасқа өз Жарлығымен тарихи естелік сөз қалдыруы тарихтан белгілі.
Оны алғаш рет геолог Қ.И.Сатбаев тапқан. Алтыншоқы белгі тасы туралы Қазақ энциклопедиясында: «Әмір Темір жаздырып қалдырған ескерткіш Ұлытаудың батыс жағындағы Сарлық алқабынан 12 км. жерде, Сөрелі өзенінің аңғарындағы Алтыншоқы биігінің оңтүстік батыс бөктерінен табылған. Ескерткішті 1934 жылы Ұлытау төңірегіне геологиялық саяхаты кезінде тауып, алғашқы ғылыми анықтамасын берген инженер- геолог Қ.И. Сатбаев. Бұл сол кезеңдегі шығыстану ғылымы үшін теңдесі жоқ жаңалық болды. Ескерткіш 1936 жылы Ленинградтағы (қазіргі Санкт Петербург) Эрмитажға жөнелтіліп, көрмеге қойылды», — деп жазылған. Шыңғыс ұрпағынан қалған сол тас ескерткіштің тұпнұсқасы бүгінде Эрмитаж төрінде тұрса, көшірмесі Ұлытауда.
Мұнан соң, оңтүстікқазақстандықтар Санкт-Петербургтегі «Атамекен» қазақ мәдени диаспорасымен кездесуі болды. Ұлттық кітапхананың ғимаратында өткен бұл кездесу — заманымыздың заңғар жазушысы Мұхтар Әуезовтің 120 жылдық мерейтойымен тұспа-тұс келді.
Әлем таныған әдебиет майталманына деген құрмет — отандастарымыздың ерекше ықыласымен жалғасып отыр. Жылдар бойы батыр қалада мекенін тапқан қазақстандықтардың елімізге деген сағынышын да осы кездесуден айқын аңғаруға болды. Қазақстаннан барған делегацияның Санкт-Петербургте екендігін білген ұйым шараға арнайы шақыртты. Тілек пен ниет біреу.
Асқан мейірбандықтың жарқын үлгісін сыйлап, М.Әуезов туралы бейнефильмді ерекше ықыласпен тыңдады. Бәйдібек ауданының тумасы Эржан Юсупов — жасы 83-те. Санкт-Петербургке білім қуып келген советтік дәуірде осында қалып, өмірінің жарқын сәттерін батыр қаламен байланыстырды. Жергілікті Университтердің бірінде шығыстанудан сабақ беретін жерлесіміз отандастарына үлкен сәлем жолдады.
Делегация жетекшісі Дулат Әбіштің еңбегін жоғары бағалаған Эржан Сағымбекұлы «Айғақ » телеарнасының айбынды тірлігіне ақ жол тіледі.
Эржан Юсупов — Ресейдегі қазақтан шыққан тұңғыш полиция-генералы. Санкт-Петербургтегі Суворовский атындағы әскери училищені тәмамдаған ол, Әл-Фараби атындағы Қазақ Ұлттық Мемлекеттік Университетінің филология факультетін бітіреді.
Санкт-Петербургтың шығыстану факультетінің екі бағыты бойынша білімін жалғастырған. Шара барысында Оңтүстіктен келген делегация жетекшісіне мінберде сөз беріп, өзара пікірлесті. Айта кетейік, кездесу «Атамекен» қоғамдық ұйымының аясында осыдан он жыл бұрын құрылған «Достар» жастар қанатының атсалысуымен ұйымдастырылып отыр.
Кештің әсерлі әрі ұмытылмастай өтуіне ұйытқы болған да осы ұйым.
«Айғақ-ақпарат».
