29 — қазан күні Оңтүстік Қазақстан облысында түрлі деңгейдегі мәслихаттағы бос орындарға сайлау өтті. Яғни, өткен жексенбіде өңірдегі 7 сайлау округіне келген дауыс берушілер өз таңдауын жасады. Бұл күні облыс халқы әлеуметтік дамуға аса мән беріп, қоғам жұмысына белсенділікпен араласатын қалаулыға сенім білдірді. Сайлауды әзірлеу және өткізу барысында комиссиясының атына ешқандай арыз-шағым түскен жоқ. Бұл туралы ОҚО өңірлік коммуникациялар қызметінде өткен брифингте облыстық аумақтық сайлау комиссиясының төрағасы Әлібек Өмірәлиев мәлім етті.
Комиссия төрағасының айтуынша, сайлау Конституциялық заң талаптарына сай өткізілген. Нәтижесінде № 11 облыстық сайлау округі бойынша облыстық мәслихаттың депутаты болып «Ұлы Орда» ЖШС-нің президенті Қайрат Сүлейменов сайланды. 1981 жылы ОҚО, Еңбекші ауданы, Жұлдыз ауылында дүниеге келген Қайрат Мұсаханұлы М.Әуезов атындағы ОҚМУ -ін «Инженер-технолог», «Экономист» мамандықтары бойынша бітірген. 2012 жылдан бері «Нұр Отан» партиясының мүшесі.
Ал, № 35 сайлау округі бойынша өзге үміткерлерден «SAURAN group» ЖШС-нің кеңесшісі Абдурашит Омаров баса озып, халық қалаулысы атанды.
Сонымен қатар, № 49 сайлау округі бойынша облыстық мәслихаттың депутаты болып «Хамит» АӨК басқармасы төрағасы Серманиязов Бақытжан Қыпшақбайұлы, ал № 50 сайлау округі бойынша облыстық мәслихаттың депутаты болып Қазақстан инженерлі-педагогикалық «Халықтар достығы» университетінің ректоры Қуатбекова Рабиға Әбдімұсақызы сайланды.
Сондай-ақ, бос тұрған Түркістан қалалық мәслихатының депутатығына Дәурен Тәңірбергенов сайланды. Өңірлік сайлау комиссиясының төрағасы Әлібек Өмірәлиев айтуынша, бос орындарға депутат сайлау үшін облыс бойынша 10 сайлау округі жұмыс істеп, 91 мың 974 адам дауыс берген. Жалпы депутаттыққа 42 адам өтініш білдірген. Олардың 38-і тіркеліп, оның 20-сы декларациялық айырмашылық пен жеке арыздары бойынша сайлауға қатыстырылмаған. Қалған 18 үміткердің ішінде 4 адам облыстық, 2 үміткер қалалық, 1 адам аудандық мәслихатқа сайланды.
Аяжан Дәулетбай
