«Қасиетті Қазақстан», «Ұлы дала жолы» жобаларының авторы, ОҚО мәслихатының депутаты, ОҚО Қоғамдық Кеңесінің мүшесі Дулат Әбіш Ақтөбе қаласындағы ірі телерадиокомпания «Тандем» радиосында тікелей эфирде сұхбат берді. Елбасы Нұрсұлтан Назарбаевтың «Рухани жаңғыру: Болашаққа бағдар» бағдарламалық мақаласының негізінде қолға алынған қос бірдей жобаның мақсаты жүзеге асқандығын қуанышпен жеткізді. Қазақстанның батыс өңірлеріне жасалған 15 күндік сапар барысында Қазақстанның қасиетті рухани құндылықтары болып табылатын киелі жерлердің тізіміне енген архитектуралық ескерткіштер мен көне қалалардан түсірілім ұйымдастырып, қастерлі жерлердің қасиетін Оңтүстік жұртшылығына ұсынбақ.
Сондай-ақ, сұхбат барысында «Айғақ» телеарнасының жұмыс барысы, жобаларымен таныстырып өтті.
Ақтөбе облысындағы «Тандем» Телерадиокомпаниясының басшысы, Ақтөбе облыстық мәслихатының депутаты Тәттігүл Талаева Оңтүстіктегі әріптесі «Айғақ» Телерадиокомпаниясының басшысы Дулат Әбішті қуанышпен қарсы алып, ұжыммен таныстырды.
«Тандем» радиосы 2000 жылдың 25 желтоқсанында алғаш рет Ақтөбе қаласында жұмысын бастады.
2003 жылдың 1-ші тамызында Атырау қаласында эфирге шықса, үш жылдан соң «Тандем W плюс» телевидениесі Атырауда, қыркүйек айында Ақтөбе қаласында іске кірісті.
Бүгінде «Тандем» радиосының тыңдармандары 25 жастан жоғары азаматтар болса, 58 пайызы мемлекеттік тілде хабар таратады. Жергілікті радиостанциялар арасында 1-ші орынды иеленуде. Журналистер күніне орай Елбасы Н.Назарбаев тарапынан «Аймақтық БАҚ дамуына септігі үшін» алғыс хатқа ие болған.
