Бокстан әлем чемпионы Қайрат Ералиев пен қола жүлдегері Жомарт Ержан елге оралды. Оңтүстік Қазақстан облысынан шыққан қос азаматты әуежайдан спорт жанкүйерлері күтіп алды. Айта кетейік, Германияның Гамбург қаласында 25 тамызда әлем чемпионаты өткен болатын. Онда үш бірдей жерлесіміз, жалпы алты Қазақстандық қатысып, командалық есепте 3 — орынға қол жеткізді. Байрақты бәсекеде Оңтүстік атынан барған үш спортшының бірі Қайрат Ералиев көк туымызды көкке желбіретіп, алтынға ие болды. Осылайша, қазақ боксы тарихында 11-ші әлем чемпионы атанды. Ал, 49 келі салмақта өнер көрсеткен Жомарт Ержан қола жүлдені қанағат тұтып, жеңіс тұғырынан көрінді. Екі азаматта жастайынан спортқа қызығып, көптеген жарыстарда жеңімпаз атанып жүр. Ал, бұл жолғы жеңістің дәмі мүлдем бөлек. Өйткені артылған сенім мен үмітті арқалап өзге елде өнер көрсету күш пен жігердің жемісі дейді. Ел абыройын асқақ етіп, халық үмітін ақтаған жерлестеріміз берілген тапсырма мен жүктелген межені бағындырды. Ата-анасының берген тәрбиесі мен бапкерлерінің баптауынан мүдірмей, сүрінбей өткен қос боксшыны әлі алда көп жарыстар күтіп тұр.
