Құрметті жерлестер!
Сіздерді Қазақстан Республикасының Конституциясы күнімен шын жүректен құттықтаймын!
Осыдан 22 жыл бұрын Қазақстан халқы тарихи таңдау жасап, бүкілхалықтық референдумда еліміздің Конституциясын қабылдады.
Қоғамның өркендеуіне қарқын қосып, Қазақстан халқының бірлігіне жол бастаған Ата Заңда бекітілген республикамыздың тұғырлы қағидаттары бүгінде өзінің өміршеңдігін дәлелдеді. Еліміздің халықаралық қоғамдастықта лайықты орын алып, биік белеске көтерілгені осының айғағы. Әрбір қазақстандық келешекке керуен тартқан мемлекетіміздің тұрақты дамуының кепілі Конституцияның мемлекет пен қоғам үшін ғана емес, өзінің жеке басы мен отбасы үшін де маңыздылығын терең сезінеді.
Ұлтымыздың ұлан-ғайыр тарихында Қасым ханның «Қасқа жолынан» бастау алған бүгінгі Конституциямыз – Елбасы ұсынып, халық қолдаған, елімізді биік белеске шығарған, тарихи маңызы аса зор құжат.
Ата Заң біздің бүкіл жарқын істеріміздің қайнар бастауына айналды. Конституция мызғымас мемлекеттігіміздің алтын қазығы, бірлігі мен ынтымағы жарасқан елдігіміздің бұлжымас бағдары, кемел келешегіміздің кепілі.
Конституциялық қағидаларды берік ұстану заңдардың қызмет аясын кеңейтіп, құқықтық мемлекет пен азаматтық қоғамның үдемелі дамуына жол ашты.
Біз аз уақытта айбары асқан қуатты ұлтқа,дәулеті тасқан әулетті елге айналдық. Ортақ шаңырағымыздың шекарасын шегелеп, іргемізді мызғымастай етіп бекіттік. Тағдыр тоғыстырған, тарих табыстырған түрлі ұлт өкілдері Конституция қағидаттары төңірегінде топтасты. Еуразияның жүрегіне орналасқан Елордамыз әлемге руханияттың ірі орталығы, саясаттың іргелі ордасы ретінде танылды.
Астана қаласында өткізіліп жатқан «ЭКСПО-2017» Халықаралық көрмесінің өткізілуі Қазақстанның әлемдік аренадағы беделін нығайтып қана қоймай, жаңа жетістіктерге жетелейді.
Дамыған елдердің қатарына енуді алдына бағдар етіп алған тәуелсіз Қазақстанның әрбір жылы толысу, кемелдену жылына айналғаны өмір шындығы. Келелі, кемел істер атқаруымыздың арқасында экономикамыз қарқынды өсіп-өркендеуде, халқымыз берекелі тіршілік кешуде.
Құрметті жерлестер!
Саяси тұрақтылық пен халық бірлігінің алтын діңгегі саналатын – Ата заңымыздың қабылдануының 22 жылдық мерейлі мерекесімен тағы да құттықтай отырып, әр шаңыраққа бақ-береке, зор денсаулық, толағай табыстар тілеймін.
Ізгі ниетпен, Шардара ауданының әкімі Болатбек ҚЫСТАУОВ.
