Астанада дарынды жастардың бастамасымен жүзеге асқан Method Pro жобасы арқылы жастар тегін тағылымдамадан өтіп жатыр. Бас шаһардағы алғашқы бағдарламалау мектебінің негізін салушылардың бірі Дагар Дәулетовтің айтуынша, Қазақстаннан бөлек білімге құштар шетелдік жастардан,10 мың ұсыныс түскен. Оның ішінен қабілетті деген 100 адам іріктеліп, ІТ саласының қыр-сырымен танысып жатыр. Қазір олар бағдарламалауды веб-сайт және мобильдік қосымша жасауды, бизнес сараптауды үйреніп жатыр. Бұл жоба тәжірибесіз студенттердің жұмысқа орналасу мәселесін реттейді. «Сонымен қатар отандық компаниялардың ақпараттық-коммуникативтік қызмет рөлінің нығаюына оң әсер етеді», – дейді жоба жетекшісі. Жобаға Қазақстан Республикасы Тұңғыш Президенті – Елбасы қоры қолдау көрсетіп отыр. Дагар Дәулетов, Method Pro бағдарламалау мектебінің жетекшісі: — Жалпы тағылымдама екі ай бойы болады. Бірінші айы өтті. Бірінші ай теория жүзінде болса, екінші ай тағылымдама болады. Студенттерге компаниялардан 15 тәжірибелік жоба бердік. Айнұр Исабаева, ҚР Тұңғыш Президенті – Елбасы қорының өкілі: — Бағдарлама барысында біздің жас ІТ мамандар ірі ұлттық компаниялардың кейстарына өз бағдарламасын ұсынады. Егер ол бағдарлама сапасы жақсы болса, сол компанияларға жұмысқа тұра алады. Тұңғыш Президент қоры бірқатар ірі ІТ жобаларды қолдап келеді.
Дереккөз: www.24.kz
