ҚР ұлттық экономика министрі Тимур Сүлейменов әлеуметтік маңызы бар азық-түлік тауарларының бағаларына қатысты жағдай туралы баяндады – деп хабарлайды премьер-министрдің баспасөз қызметі.
«Жасалған меморандумдар аясындағы министрліктер мен әкімдіктердің бірлескен жұмысы әлеуметтік маңызы бар азық-түлік тауарларына тұтынушылық бағалар индексінің өсу қарқынын қаңтар-наурыздағы 1,2 %-дан сәуір мен мамыр айларында 0,6% және 0,9%-ға дейін төмендетуге мүмкіндік берді. Сонымен қатар, маусымда тұтынушылық бағалар индексінің 1,9%-ға дейін артқаны байқалуда», — деп атап өтті Т. Сүлейменов.
Өз кезегінде, ҚР ауыл шаруашылығы бірінші вице-министрі Қайрат Айтуғанов тұрақтандыру қорларының жұмысы туралы баяндады. Әкімдіктермен әлеуметтік маңызы бар азық-түлік тауарлары бағаларының өсуіне жол бермеу бойынша меморандумдар жасалды.
Қарағанды, Батыс Қазақстан облыстарының және Астана қаласының әкімдері Е. Қошанов, А. Көлгінов және Ә. Исекешев өңірлердегі жағдай туралы баяндама жасады.
Отырыс барысында ҚР Премьер-Министрінің орынбасары Асқар Мырзахметов әкімдіктерде әлеуметтік маңызы бар өнімдердің бағаларын тұрақтандыру үшін барлық мүмкіндіктер барын атап өтті. Өңірлерге тұрақтандыру қорларына жаңа түсім өнімдерін сатып алуға кірісу керек.
Отырыс мәселелерін қарауды қорытындылай келе, ҚР Премьер-Министрі Бақытжан Сағынтаев әкімдіктерге әлеуметтік маңызы бар азық-түлік тауарларының бағаларын тұрақтандыру бойынша жұмысты күшейтуді тапсырды.
ҚР ұлттық экономика және ауыл шаруашылығы министрліктеріне бағалар серпініне тұрақты мониторинг жүргізуді қамтамасыз ету тапсырылды.
Мемлекеттік органдарға әкімдіктермен бірге басым түрде өңірлік базарларды азық-түлікпен толықтыру және сауда инфрақұрылымын дамыту бойынша шаралар қабылдау қажет.
