12-13 шілде аралығында елордада «Жасыл көпір» серіктестік бағдарламасына арналған V халықаралық форум өтеді. Оған халықаралық ұйымдардың беделді өкілдері және министрлер қатысады. Онда Париж климаттық келісімін іске асыру және әлем үшін өзекті мәселелер көпшіліктің талқысына салынады. Бұл туралы арнайы баспасөз мәслихатында ҚР Энергетика министрлігінің баспасөз хатшысы Рауан Есқали мәлімдеді, деп хабарлайды Baq.kz тілшісі.
«12-13 шілде күні «ЭКСПО-2017» халықаралық көрмесінің аумағындағы Конгресс орталықта «Жасыл көпір» серіктестік бағдарламасына арналған V халықаралық форумы өтеді. Форумды ҚР Энергетика министрі Қанат Бозымбаев ашады. Шара жасыл экономика саласында жасыл технологияларды енгізу бойынша халықаралық озық тәжірибелермен алмасу алаңы болады. Форум аясында Париж климаттық келісімін іске асыру әрі жасыл қаржыны мобилизациялау үшін төмен көміртекті технологиялар мен саясат мәселелері талқыланады», — деді ол.
Осы орайда Рауан Есқали халықаралық шараға беделді ғалымдар мен саясаткерлер қатысатындығын айтты.
«Астанада жасыл технологияларды енгізу мәселелерін талқылау үшін әлемге танымал ғалымдар бас қосады. Форумға Нобель сыйлығының лауреаты Рае Квон Чунг, Пәкістанның климатты өзгерту жөніндегі федералды министрі Захид Хамид және тағы басқа халықаралық ұйымдардың жоғары лауазымды қызметкерлері қатысады», — деді энергетика министрлігінің баспасөз хатшысы.
Айта кетейік, маңызды шараға журналистерді аккредитациялау ертең сағат 12-де аяқталады.
Дереккөз: Baq.kz