«Айғақ» телеарнасының редакторы Абай Омар Туркия мемлекетіндегі іс-сапары бойынша төмендегіні хабарлайды:
Үстіміздегі жылдың 9 шілдесінде ОҚО əкімінің жолдамасы бойынша Туркияға жол тартқан бір топ жергілікті БАҚ өкілдері Стамбул қаласына келіп жетті.
Ататүрік əуежайына түскен бойда ОҚО делегациясын күтіп алған ҚР-ның Туркиядағы Төтенше жəне өкілетті елшілігінің қызметкерлері бекітілген күн тəртібі бойынша БАҚ өкілдерін жергілікті ең ірі ақпарат орталығының Стамбул қаласындағы бөлімшесіне алып келді.
Ол Анадолу агенттігі деп аталады. Бір ғасырға жуық тарихы бар аталмыш орталық əлемнің 85 елінен 11 тілде ақпарат таратады. Сонымен бірге Туркия еліндегі жаңалықтар кеңістігінің 63 пайызы осы агенттікке тиесілі. Орта есеппен күніне 1200 жаңалық таралатын орталықтың барлық құрылымдық бөлімшелері бойынша 2300-ге тарта азамат жұмыс жасайды. Əлемнің 39 елінде өз кеңселерін орнықтырған Анодолу ақпарат агенттігі алдағы уақытта бауырлас Қазақ елінен де өз кеңселерін ашуды жоспарлап отыр. Осылай деген алпауыт агенттіктің Стамбул қаласындағы үйлестірушісі Иылмаз Яман мырза Оңтүстік Қазақстандық БАҚ өкілдерін арнайы қабылдап ыстық ілтипатын білдірді.
Сонымен бірге, орталық ғимаратын аралатып агенттіктің жұмысымен жан-жақты таныстырды. Айта кету керек түбі бір Түрік еліне ақпараттық тəжірибие алмасуға келген жергілікті БАҚ өкілдерінің сапары бір апта мерзімге жоспарланған.
Абай Омар
